पुणे, ता. ७ ः गणेशोत्सवात अनेक मंडळांना सेवा देणाऱ्या ढोल-ताशा पथकांना सराव आणि वाद्ये ठेवण्यासाठी महापालिकेने भाडेतत्त्वावर तात्पुरत्या स्वरूपात नदीपात्राजवळ जागा उपलब्ध करून द्यावी, अशी मागणी प्रदेश काँग्रेसचे प्रवक्ते गोपाळ तिवारी यांनी एका निवेदनाद्वारे महापालिका आयुक्त नवल किशोर राम यांच्याकडे नुकतीच केली.

पुण्यातील गणेशोत्सवाची जगभर ख्याती आहे. राज्याच्या या सांस्कृतिक लोकोत्सवात ढोल-ताशा पथकेही उत्साहाने सहभागी होतात. त्यात युवकांचा मोठा सहभाग असतो. उत्सवापूर्वी सुमारे दोन-तीन महिने त्यांचा वादनाचा सराव सुरू होतो. या युवकांना विशिष्ट कालावधीसाठी शुल्क आकारून महापालिकेने नदीपात्राजवळ जागा उपलब्ध करून देणे गरजेचे आहे. त्यामुळे पथकांना अधिकृत वीज पुरवठा घेता येईल, तसेच वाद्येही सुरक्षितपणे ठेवता येईल. फटाक्यांच्या स्टॉल्सच्या धर्तीवर धोरण निश्चित करून ढोल-ताशा पथकांना सामावून घेतल्यास त्यांची महापालिकेकडे नोंद होईल आणि जबाबदारीचेही त्यांच्यावर बंधन राहील. महापालिकेने सहकार्य केल्यास ढोल-ताशा पथकांचा खर्च कमी होऊन युवकांनाही उत्साहाने त्यात सहभागी होता येईल, असे तिवारी यांनी दिलेल्या निवेदनात म्हटले आहे.