मुंबई, ता. ८ : महाराष्ट्र राज्य पोलिस गृहनिर्माण महामंडळास अधिकृत विकसक म्हणून नेमल्यास पोलिस वसाहतींच्या उभारणीस गती येईल, अशी भूमिका आमदार सिद्धार्थ शिरोळे यांनी विधिमंडळाच्या सभागृहात मांडली. राज्यभरातील पोलिस वसाहतींची स्थिती दयनीय असून, काही ठिकाणी नव्याने बांधकामांची आवश्यकता निर्माण झाली आहे, असेही त्यांनी यावेळी नमूद केले.

राज्यातील अनेक पोलिस वसाहती जुनाट आहेत. त्यांची देखभाल व दुरुस्तीची कामे वेळखाऊ आणि खर्चिक ठरत आहेत. अशा परिस्थितीत पोलिस गृहनिर्माण महामंडळाला विकसक म्हणून नेमल्यास, पोलिस कर्मचारी आणि त्यांच्या कुटुंबीयांना दर्जेदार वसाहती मिळण्यास मदत होईल, असे आमदार शिरोळे म्हणाले.

दरम्यान, पुण्यातील छत्रपती शिवाजीनगर मतदारसंघातील गणेशखिंड रस्त्यावर असलेल्या विशेष पोलिस महानिरीक्षक (मोटर परिवहन विभाग) यांच्या जागेचे पुणे महापालिकेस हस्तांतरित करणे अद्याप बाकी आहे. या जागेच्या हस्तांतरामुळे वाहतुकीच्या अडचणी कमी होतील. यासंदर्भात गृहमंत्र्यांनी निर्देश द्यावेत, अशी मागणी आमदार शिरोळे यांनी केली.