पुणे, ता. ११ : जागतिक डॉक्टर्स दिनाचे औचित्य साधून डॉ. अभंग प्रभू मेडिकल ॲकॅडमीच्या (एपीएमए) वतीने वैद्यकीय शिक्षण घेण्यासाठी आवश्यक असलेल्या ‘नीट’ परीक्षेत उल्लेखनीय यश मिळवलेल्या विद्यार्थ्यांचा सन्मान करण्यात आला.

बाणेर येथील बंतारा भवनात आयोजित सोहळ्यात ज्येष्ठ अस्थिरोगतज्ज्ञ डॉ. सचिन तपस्वी, ‘एपीएमए’चे संचालक डॉ. अभंग प्रभू, डॉ. अर्चना प्रभू, डॉ. हिमानी तपस्वी, प्रा. सचिन हळदवणेकर, समुपदेशिका डॉ. शीतल श्रीगिरी आदी उपस्थित होते. गुणवत्ता यादीत आलेल्या तनिष्क दासवंत, मानव वैद्य, श्रावणी पोरे, रिजुल सांबरे व निषाद लुब्री या विद्यार्थ्यांचा सन्मान करण्यात आला. या प्रसंगी बायोलॉजी विषयात देशात प्रथम आलेल्या रिजुल सांबरे हिचा विशेष गौरव करण्यात आला. विद्यार्थ्यांना करंडक आणि रोख रक्कम असे बक्षीस देऊन गौरविण्यात आले.