पुणे, ता. १४ ः जिल्हा परिषदेच्या ‘मॉडेल स्कूल’ उपक्रमाच्या तीनशे शाळांसाठी २३९ कोटी रुपयांच्या सर्व २५ निविदा काढण्यात आल्या आहेत. त्यापैकी बारामती, शिरूर आणि खेड तालुक्यातील निविदा प्रक्रिया या वर्क ऑर्डरच्या प्रक्रियेमध्ये असल्याची माहिती जिल्हा परिषदेचे मुख्य कार्यकारी अधिकारी गजानन पाटील यांनी दिली.
मॉडेल स्कूल उपक्रमांतर्गत जिल्हा परिषदेच्या ३०३ शाळांची निवड करण्यात आली असून, या शाळांमध्ये शैक्षणिक व भौतिक पातळीवर दर्जात्मक सुधारणा घडविण्याचा निर्धार करण्यात आला आहे. याबाबत पाटील म्हणाले, ‘‘शाळा दुरुस्ती, सुसज्ज वर्गखोल्या, संगणक प्रयोगशाळा, आधुनिक ग्रंथालय, हँडवॉश स्टेशन, स्वच्छतागृह, संरक्षण भिंत, सौरऊर्जा प्रकल्प, डिजिटल बोर्ड यांसारख्या सुविधा पुरविल्या जाणार आहेत. यामुळे विद्यार्थ्यांना केवळ शैक्षणिक नव्हे तर व्यावसायिक आणि व्यक्तिमत्त्वविकासाचे धडे दिले जाणार आहेत. पुणे मॉडेल स्कूल उपक्रमामुळे जिल्हा परिषद शाळांचा कायापालट होणार असून, विद्यार्थ्यांना आधुनिक, सुसज्ज व प्रेरणादायी शैक्षणिक वातावरण मिळणार आहे. या उपक्रमामुळे जिल्हा परिषदेच्या शाळांमध्ये शिक्षणाच्या गुणवत्तेत वाढ होणार आहे. तंत्रज्ञानाचा वापर वाढेल. विद्यार्थ्यांना मोफत आणि गुणवत्तापूर्ण शिक्षण मिळण्यास मदत होणार आहे.’’

निविदा एकत्रिकरणाला विरोध...
जिल्हा परिषदेने मॉडेल स्कूल उपक्रमासाठी प्रत्येक शाळेची वेगळी निविदा न काढता काही शाळांची मिळून एकत्रित निविदा प्रक्रिया राबविण्याचे ठरवले. त्याला ठेकेदार संघटनांकडून विरोध दर्शविण्यात आला होता. मात्र, कामाचा दर्जा राखण्यासाठी एकत्रीकरण गरजेची असल्याची भूमिका जिल्हा परिषद प्रशासनाकडून मांडण्यात आली होती.