पुणे, ता. १४ : शहरात सोमवारी दिवसभर ऊन-पावसाचा खेळ सुरू होता. मंगळवारी कोरेगाव पार्क, लवळे व लोहगाव येथे प्रत्‍येकी एक मिलिमीटर पावसाची नोंद झाली. बुधवारी घाटमाथ्‍यावर तुरळक ठिकाणी मध्‍यम ते जोरदार स्‍वरूपाचा पाऊस पडण्‍याची शक्‍यता हवामान विभागाने व्‍यक्‍त केली आहे. पुढील आठवडाभरात कमाल व किमान तापमानात आणखी वाढ होण्याची शक्यता भारतीय हवामानशास्त्र विभागाने वर्तविली आहे.
शहरात रविवारपासून ऊन पावसाचा खेळ सुरू आहे. सोमवारीही सकाळी व दुपारी ऊन-पावसाचा खेळ सुरू होता. तर दिवसभर ढगाळ वातावरण होते. दुपारी व सायंकाळच्‍या उपनगरांमध्ये काही ठिकाणी पावसाच्‍या हलक्‍या सरी बरसल्‍या. तर, कोरेगाव पार्क, लवळे व लोहगाव येथे येथे एक मिलिमीटर वगळता इतर कोठेही पावसाची नोंद झाली नाही. तसेच कमाल व किमान तापमानही स्थिर आहे. शहर आणि परिसरात सोमवारी (ता. १४) हवामानात फारसा बदल झाला नसल्याने कमाल तापमान २८ अंश सेल्सिअस तर किमान तापमान २२.४ अंश सेल्सिअस नोंदविण्यात आले. मात्र पुढील दोन दिवसांत कमाल तापमानात किंचित वाढ होऊन कमाल तापमान २८ ते ३० अंश सेल्सिअस तर किमान तापमानात वाढ होऊन ते २३ ते २४ सेल्सिअसपर्यंत नोंदविण्यात येणार असल्‍याचा अंदाज व्‍यक्‍त केला आहे.

सध्याच्या ४८ तासांत कोकण आणि मध्य महाराष्ट्रातील घाटमाथ्यांमध्ये पाऊस अंशतः वाढण्याची शक्यता आहे. पश्चिम बंगाल व लगतच्या भागांवर कमी दाबाचा पट्टा निर्माण झाला असून तो पश्चिम-उत्तर पश्चिम दिशेने सरकण्याची शक्यता आहे. याचवेळी अरबी समुद्रातून येणाऱ्या पश्चिमी वाऱ्यांमुळे मुंबईसह कोकणातील आणि मध्य महाराष्ट्रातील जिल्हे व पुण्याच्‍या घाट भागांमध्ये यलो अलर्ट जाहीर करण्यात आला आहे. पुणे शहरात ४८ तासांत हलक्या स्वरूपाचा पाऊस होण्याची शक्यता आहे.
- अनुपम कश्‍यपी, माजी प्रमुख भारतीय हवामानशास्‍त्र विभाग