पुणे, ता. २० ः पिंपरी-चिंचवड महापालिकेत सुनेला नोकरी लावण्याचे आमिष दाखवून ज्येष्ठ नागरिकाची १४ लाख रुपयांची फसवणूक केल्याचा प्रकार समोर आला आहे. या प्रकरणी विमानतळ पोलिसांनी दोघांवर फसवणुकीचा गुन्हा दाखल केला आहे.
खराडी येथील एका ६५ वर्षीय ज्येष्ठ नागरिकाची २०२३ मध्ये आरोपी सुभाष महाजन (वय ६५, रा. फुरसुंगी) आणि अभिजित महाजन (वय ३१, रा. मिरज, सांगली) यांच्याशी एका परिचितामार्फत ओळख झाली होती.
सुभाष महाजन यांनी ज्येष्ठ नागरिकास अभिजित महाजन हे पिंपरी-चिंचवड महापालिकेत अधिकारी असल्याचे सांगितले. तुमच्या सुनेला लिपिक पदावर नोकरी लावतो, असे आमिष दाखवून त्यांनी १४ लाख रुपये उकळले. मात्र, नोकरी मिळाली नाही.
दीर्घकाळ प्रतीक्षा करूनही नोकरी न मिळाल्याने संबंधितांनी आरोपींकडे विचारणा केली. त्यावेळी आरोपींनी उडवाउडवीची उत्तरे देत वेळ मारून नेण्याचा प्रयत्न केला. अखेर फसवणूक झाल्याचे लक्षात येताच पीडित ज्येष्ठ नागरिकाने विमानतळ पोलिस ठाण्यात धाव घेतली.
-------