पुणे, ता. २३ : लोकमान्य टिळक स्मारक ट्रस्टच्या वतीने देण्‍यात येणारा यंदाचा ४३ वा ‘लोकमान्य टिळक राष्ट्रीय पुरस्कार’ केंद्रीय रस्ते वाहतूक आणि महामार्ग मंत्री नितीन गडकरी यांना जाहीर झाला आहे. या पुरस्‍काराचे वितरण लोकमान्य टिळक यांच्‍या १०५ व्‍या पुण्यतिथीला एक ऑगस्टला सकाळी साडेदहा वाजता टिळक स्मारक मंदिरात होणार आहे, अशी माहिती टिळक स्मारक ट्रस्टचे अध्यक्ष डॉ. रोहित टिळक यांनी पत्रकार परिषदेत दिली.
या पुरस्कार वितरण सोहळ्यास मुख्यमंत्री देवेंद्र फडणवीस, उपमुख्यमंत्री एकनाथ शिंदे, उपमुख्यमंत्री अजित पवार, माजी केंद्रीय गृहमंत्री सुशीलकुमार शिंदे उपस्थित राहणार आहेत. या वेळी टिळक स्मारक ट्रस्टच्या विश्‍वस्त डॉ. गीताली टिळक, विश्‍वस्‍त डॉ. प्रणती टिळक, विश्‍वस्त रामचंद्र नामजोशी, सरिता साठे उपस्थित असतील. प्रारंभी लोकमान्य टिळक यांचे पणतू डॉ. दीपक टिळक यांना श्रद्धांजली अर्पण केली जाणार आहे.
गडकरी यांनी देशातील पायाभूत सुविधांच्या विकासात महत्त्वपूर्ण योगदान दिले आहे. लोकमान्यांच्या चतु:सूत्रीतील स्वदेशीचा स्वीकार करत रस्त्यांच्या माध्यमातून राष्ट्र उभारणीसाठी गडकरी कार्यरत आहेत. देशाच्या विकासासाठी त्यांनी दिलेले योगदान लक्षात घेऊन त्यांची यंदाच्या लोकमान्य टिळक राष्ट्रीय पुरस्कारासाठी निवड करण्यात आली आहे, असे डॉ. रोहित टिळक यांनी नमूद केले. स्मृतिचिन्ह, सन्मानपत्र आणि एक लाख रुपये, असे पुरस्काराचे स्वरूप आहे.