पुणे, ता. २६ : देशातील संवेदनशील व महत्त्वाच्या स्थळांवर सुरक्षा व्यवस्था अधिक सक्षम करण्याच्या दिशेने केंद्रीय औद्योगिक सुरक्षा दलाने (सीआयएसएफ) महत्त्वपूर्ण पाऊल उचलले आहे. बदलत्या सुरक्षा आव्हानांचा सामना करण्यासाठी ‘सीआयएसएफ’ने आता ‘बॅटल रेडी’ होण्यासाठी भारतीय लष्करासोबत संयुक्त विशेष प्रशिक्षण सुरू केले आहे.

हे प्रशिक्षण ‘सीआयएसएफ’च्या क्षमतेत वाढ करणारे ठरणार आहे. ‘बॅटल रेडी’ या उपक्रमांतर्गत ‘सीआयएसएफ’चे जवान काश्मीर खोऱ्यातील लष्कराच्या तळांवर नाईट ऑपरेशन्स, जंगल वॉरफेअर, क्लोज-कॉम्बॅट टेक्निक्स आणि एंड्युरन्स ड्रिल्ससारख्या अत्याधुनिक युद्धतंत्रांचे प्रशिक्षण घेत आहेत. ‘सीआयएसएफ’च्या जवानांना विमानतळ, अणुऊर्जा प्रकल्प, संसद भवन, मोठ्या सरकारी इमारती यांसारख्या उच्च-संवेदनशील ठिकाणी कोणताही अचानक धोका उद्‌भवल्यास जलद आणि अचूक प्रतिसाद देण्याची क्षमता मिळावी, हा यामागील उद्देश्य आहे.

आत्मविश्वास आणि सज्जता वाढवणारे प्रशिक्षण
या प्रशिक्षणामुळे जवानांची मानसिक ताकद, शारीरिक सहनशक्ती आणि रणनैतिक कौशल्य मोठ्या प्रमाणावर वाढणार आहे. खास करून ड्रोन हल्ले, एकाचवेळी होणारे दहशतवादी हल्ले व तोडफोडीच्या घटनांना तोंड देण्यासाठी ‘सीआयएसएफ’ची सज्जता वाढवली जात आहे.