पुणे, ता. ३० : संत नामदेव महाराज वारकरी संप्रदायाचे जनक असून नामाचा महिमा त्यांनी सर्वदूर पोहोचवला. भोळ्याभाबड्या भक्तीने केलेले नामस्मरणदेखील भगवंतापर्यंत पोहोचते, अशी त्यांची साधना होती, असे उद्‍गार श्री विठ्ठल-रुक्मिणी मंदिर देवस्थान समिती सहअध्यक्ष गहिनीनाथ औसेकर महाराज यांनी काढले. संत नामदेव महाराज यांचा ६७५व्या संजीवन समाधी सोहळा, तसेच कोथरूड पश्चिम विभाग नामदेव शिंपी समाजाच्या रौप्य महोत्सवी वर्षाच्या स्मरणिका प्रकाशनप्रसंगी ते बोलत होते. या वेळी संस्थेचे अध्यक्ष दिलीप कुमार वायचळ, प्रतिशिर्डी शिरगावचे संस्थापक प्रकाश देवळे, सावित्रीबाई फुले विद्यापीठाचे प्र-कुलगुरू पराग काळकर, मोनिका मोहोळ, भाजपचे प्रदेश महामंत्री राजेश पांडे, भाजप शहराध्यक्ष धीरज घाटे, उपाध्यक्ष प्रशांत हरसुले, संस्थेचे उपाध्यक्ष भारत चुंबळकर आदी उपस्थित होते. रौप्य महोत्सवी वर्षानिमित्त संस्थेच्या स्मरणिकेचे प्रकाशन झाले. त्यानंतर विविध क्षेत्रातील मान्यवर व गुणवंत विद्यार्थ्यांचा सन्मान करण्यात आला.