‘सकाळ’ने आयोजित केलेला हा कार्यक्रम अतिशय उपयुक्त होता. सध्याची तरुण पिढी करिअरमागे आहे. मात्र यात मातृत्वाच्या जबाबदारीकडे दुर्लक्ष झाल्यास मुलांना खूप अडचणींना सामोरे जावे लागते. हे टाळण्यासाठी कोणते उपचार, काळजी घ्यावी, याबाबत या चर्चासत्रात उत्तम मार्गदर्शन झाले. यामुळे अनेक शंका दूर झाल्या, तसेच बाळंतपणाविषयीची भीती दूर झाली.
- रेश्मा गांधी

मी सध्या पीएच.डी. करत असून, नुकतेच लग्न झाले आहे. त्यामुळे ‘पीएच.डी.’नंतर नोकरी करावी की मातृत्वाची जबाबदारी स्वीकारावी, याबाबत गोंधळात होते. मात्र या चर्चासत्राने हा गोंधळ दूर करण्यासाठी मदत झाली. या सगळ्या परिस्थितीत स्त्रियांनी स्वतःला कसे सांभाळायचे, मानसिक आरोग्य कसे जपायचे, हेदेखील समजले. उपस्थित मान्यवरांनीदेखील स्वतःचे अनुभव सांगून ही प्रक्रिया किती सरळ आणि सहज आहे, हे सांगितले.
- कृती पराडकर

तरुण मुला-मुलींसाठी यासारखे कार्यक्रम आयोजित करणे खूप गरजेचे आहे. कारण त्यांना वेळेत लग्न होणे, वेळेत आई-वडील होणे, याचे गांभीर्य माहिती नाही. येथे उपस्थित सर्व डॉक्टरांनी खूप चांगल्या प्रकारे सल्ले दिले, उपचाराच्या विविध पद्धती सांगितल्या. हा खूप आगळावेगळा कार्यक्रम आयोजित केल्याबद्दल ‘सकाळ’चे मनःपूर्वक आभार.
- मंगल मोहिते

विविध क्षेत्रांत उच्चपदावर काम करणाऱ्या आणि त्याचवेळी मातृत्वाची जबाबदारी सक्षमपणे निभावणाऱ्या महिलांचे अनुभव ऐकायला मिळाले. दुसरीकडे या सगळ्या प्रक्रियेबाबत वैद्यकीय सल्ले आणि मार्गदर्शनही तज्ज्ञ डॉक्टरांकडून मिळाले, तसेच ज्यांना मुले होत नाहीत, त्यांची मानसिक स्थिती आणि आव्हानांविषयीची माहितीही मिळाली.
- डॉ. राजेश्री पटवर्धन

‘आईपण भारी देवा’ हे नाव वाचूनच हा कार्यक्रम काहीतरी वेगळा असणार, असे वाटले होते. तरुण मुलींनी हा कार्यक्रम ऐकणे, समजून घेणे आणि यातील मार्गदर्शन आत्मसात करणे गरजेचे आहे. कारण फक्त बाळंतपणाविषयी नाही; तर महिलांचे शारीरिक, मानसिक, बौद्धिक आरोग्याविषयीदेखील यात चर्चा झाली. तसेच समाजभान, परिवार, जोडीदाराची साथ, वैद्यकीय मार्गदर्शन आदींबाबतही यात ऊहापोह झाला.
- वर्षा कवाडे

मातृत्व हा कोणत्याही महिलेच्या आयुष्यातला सर्वात मोठा टप्पा असतो. आजचा हा कार्यक्रम तरुण पिढीपर्यंत पोहोचणे खूप गरजेचे आहे. कारण पूर्वी एकत्र कुटुंबपद्धतीमुळे आम्हाला अनेक सोयीसुविधा होतया. पण आता विभक्त कुटुंबांमुळे तरुण मुलींसमोरील आव्हाने बदलली आहेत. ताण वाढले आहेत. त्यामुळे अशा कार्यक्रमांच्या माध्यमातून योग्य डॉक्टरांशी बोलून, मार्गदर्शन घेण्याची संधी तरुण पिढीला मिळते.
- बेबीनंदा जगताप