हडपसर, ता. ७ : भरधाव एसटी बसच्या धडकेत दुचाकीस्वाराचा मृत्यू झाला. सासवड -पुणे रस्त्यावरील सातववाडी बसथांब्यासमोर मंगळवारी सकाळी (ता. ७) सहा वाजण्याच्या सुमारास ही घटना घडली. दिनेश श्रीराम सिरसाठ (वय ३८, रा. भेकराईनगर, फुरसुंगी) असे मृत तरुणाचे नाव आहे.
पोलिसांनी दिलेल्या माहितीनुसार, दिनेश हा दुचाकीवरून कामाला निघाला होता. त्याचवेळी सातववाडी बसस्टॉपसमोर पाठीमागून भरधाव येणाऱ्या एसटी बसने त्याला धडक दिली. त्यामध्ये त्याचा जागीच मृत्यू झाला. दिनेश याचे बंधू गणेश श्रीराम सिरसाठ (वय ४९, रा. मंगरूळ नवघरे, ता. चिखली, जि. बुलडाणा) यांनी याबाबत तक्रार दिली आहे. एसटी बसचालक सूरज नामदेव तारू (वय ४२, वांगी, जि. नांदेड) याच्याविरोधात रात्री उशिरा पोलिस ठाण्यात गुन्हा दाखल झाला आहे. पोलिस उपनिरीक्षक महेश कवळे तपास करीत आहेत.