हडपसर, ता. १० : राज्य उत्पादनशुल्क विभागाच्या भरारी पथकाने उंड्री येथील उच्चभ्रू वस्तीतील आलिशान सदनिकेत छापा टाकून उच्च प्रतीचे विदेशी मद्य जप्त केले. या कारवाईत लॉईड लिओ पिंटो यास अटक करून, गुन्हा दाखल करण्यात आला आहे.
उंड्री येथील अमित कोलोरी या उच्चभ्रू सहकारी सोसायटीच्या फेज १ मधील ९०१ नंबरच्या सदनिकेत अवैध मद्यसाठा असल्याची माहिती भरारी पथकाला मिळाली होती. त्यानुसार आज दुपारी छापा टाकून कारवाई करण्यात आली. त्यामध्ये उच्च प्रतीचे विदेशी मद्य असलेल्या २४७ सिलबंद बाटल्या तसेच मद्य वाहतूक व वितरणासाठी आरोपी वापरत असलेली टाटा सफारी वाहन तसेच, एक दुचाकी वाहन असा ११ लाख ८६ हजार १९ रुपये किमतीचा मुद्देमाल जप्त केला. भरारी पथक निरीक्षक देवदत्त पोटे, अशोक शितोळे, पांडुरंग पाटील, विभाग निरीक्षक नंदकुमार देवणे, दुय्यम निरीक्षक दिनेश सूर्यवंशी, प्रकाश कोकरे आदींच्या पथकाने ही कारवाई केली.
................................