वडगाव मावळ, ता. २८ : रयत शिक्षण संस्थेच्या येथील न्यू इंग्लिश स्कूल व ज्युनिअर कॉलेजमध्ये रयत गुरुकुल प्रकल्पांतर्गत विद्यार्थी पारितोषिक वितरण सोहळा उत्साहात पार पडला.
विद्यालयामध्ये रयत गुरुकुल प्रकल्प हा नावीन्यपूर्ण प्रकल्प राबविला जात असून त्या प्रकल्पांतर्गत विद्यार्थ्यांना स्पर्धा परीक्षांचे मार्गदर्शन केले जाते. तसेच विद्यार्थ्यांसाठी ई-लर्निंग, गेस्ट लेक्चर, क्षेत्रभेटी, विविध कलागुणांना वाव देणाऱ्या स्पर्धा घेण्यात येतात. विद्यार्थ्यांच्या गुणवत्ता वाढीसोबत त्याचा सर्वांगीण विकास हे या प्रकल्पाचे ध्येय आहे. संस्थेचे समन्वयक आर. एन. देशपांडे यांनी या रयत गुरुकुल प्रकल्पाला भेट देऊन प्रकल्पाच्या कामकाजाची पाहणी केली आणि समाधान व्यक्त केले. विद्यालयात संपन्न झालेल्या कला महोत्सव-२०२५ अंतर्गत घेतलेल्या विविध स्पर्धांमध्ये गुणवंत ठरलेल्या विद्यार्थ्यांना आर. एन. देशपांडे व विद्यालयाचे प्राचार्य सतीश हाके यांच्या हस्ते पारितोषिकांचे वितरण करण्यात आले. रोटरी क्लब ऑफ तळेगाव दाभाडेचे भगवान शिंदे, संजीव मेहता, माधुरी पवार, प्रा. मोहिते आदी उपस्थित होते.