जुन्नर/ओझर (पुणे) : ""छत्रपती शिवाजी महाराजांचे राज्य हे रयतेचे राज्य होते त्याप्रमाणे मंत्रिमंडळातील सर्व सहकाऱ्यांच्या मदतीने सर्वसामान्यांना अभिप्रेत असणारे राज्य करणार आहे. सर्वांना अभिमान वाटेल, असा महाराष्ट्र घडवूया,'' असे मुख्यमंत्री उद्धव ठाकरे यांनी किल्ले शिवनेरीवर बोलताना सांगितले. 

राज्याच्या मुख्यमंत्रिपदी निवड झाल्यानंतर गुरुवारी (ता. 12) दुपारी उद्धव ठाकरे हे कुटुंबीयांसमवेत शिवजन्मस्थानी आले होते. शिवजन्मस्थळी त्यांनी दर्शन घेतले. शिवकुंज येथील बाल शिवराय व जिजाऊ माता यांच्या पुतळ्यास पुष्पहार अर्पण करून अभिवादन केले. यानंतर झालेल्या सभेत ते बोलत होते. आमदार अतुल बेनके, आदित्य ठाकरे, मिलिंद नार्वेकर, माजी खासदार शिवाजीराव आढळराव पाटील, श्‍याम पांडे, माउली खंडागळे, राजेंद्र कुंजीर आदी या वेळी उपस्थित होते. 

ठाकरे म्हणाले, ""अनपेक्षितपणे माझ्यावर राज्यकारभाराची आलेली जबाबदारी ही जिजाऊ मॉंसाहेब व छत्रपती शिवाजी महाराज यांचा आशीर्वाद आहे. त्यामुळेच येथील मातीला वंदन करण्यासाठी मी आलो आहे.'' 
या वेळी आमदार अतुल बेनके यांनी, जुन्नर तालुक्‍याचे नाव शिवनेरी तालुका करावे, अशी मागणी केली. 

नागरिकांच्या पदरी निराशा 
मुख्यमंत्री उद्धव ठाकरे यांच्या या दौऱ्याविषयी नागरिकांना मोठी उत्सुकता होती. शेतकऱ्यांच्या कर्जमाफीची व सातबारा कोरा करण्याची घोषणा मुख्यमंत्री शिवनेरीवर करतील, गडकोटविषयी बोलतील, शिवनेरीसाठी निधीची घोषणा करतील, अशी अपेक्षा व्यक्त केली जात होती. मात्र, त्यांनी कोणतीच घोषणा केली नाही. त्यामुळे पदरी निराशा पडल्याची चर्चा होत होती.