पुणे : उद्योजक तरुणीशी लग्नाचा बहाणा करून तिच्याशी शारीरिक संबंध ठेवण्याबरोबर तिची आर्थिक फसवणूक केल्याप्रकरणी एका तरुणाविरुद्ध गुन्हा दाखल करण्यात आला आहे. या प्रकरणी वानवडी पोलिस ठाण्यात गुन्हा दाखल केला आहे. 

या प्रकरणी 29 वर्षीय तरुणीने वानवडी पोलिस ठाण्यात फिर्याद दिली. त्यावरून अमित रंजन महापात्रा (वय 30, रा. बाणेर) याच्याविरुद्ध गुन्हा दाखल करण्यात आला. पोलिसांनी दिलेल्या माहितीनुसार, फिर्यादी व अमितची ओळख झाली होती. दरम्यान अमितने फिर्यादीच्या घरी जाऊन तिच्या कुटुंबीयांच्या उपस्थितीत तिला मंगळसूत्र घालून व कुंकू लावून लग्न केल्याचा बनाव रचला. 

त्यानंतर तिला, त्याच्या बाणेर येथील घरी व मुंबईतील एका नामांकित हॉटेलमध्ये नेऊन शारीरिक संबंध ठेवले. त्यानंतर तरुणीकडून व्यवसाय सुरू करण्याच्या बहाण्याने चार लाख रुपये घेतले. त्यानंतर तरुणीस शिवीगाळ करत तिला त्रास देण्यास सुरवात केली. या प्रकरणी तरुणीने वानवडी पोलिस ठाण्यात तरुणाविरुद्ध बलात्कार व आर्थिक फसवणूक केल्याप्रकरणी गुन्हा दाखल केला.