पुणे : शहरातील एसपी कॉलेजच्या इमारतीसह इतरही अनेक महत्त्वाच्या वास्तू नरहर गणपत पवार या वास्तूविशारदाने बांधल्या आहेत. पण, पुण्याने पवारांना काय दिले, अशी खंत राष्ट्रवादी काँग्रेसचे अध्यक्ष शरद पवार यांनी व्यक्त केली.

इतिहास अभ्यासक मंदार लवाटे यांच्या जुन्या पुणे शहराच्या छायाचित्रांचे 'पुणे एकेकाळी' या कॉफीटेबल बुकचे आज प्रकाशन करण्यात आले. राष्ट्रवादी काँग्रेसचे अध्यक्ष शरद पवार आणि सिक्कीमचे माजी राज्यपाल श्रीनिवास पाटील यांच्या हस्ते या पुस्तकाचे प्रकाशन करण्यात आले. 

या पुस्तकात पुणे शहरातील अनेक महत्त्वाच्या वास्तूंचा समावेश आहे आणि त्याबाबतची खास माहिती देखील देण्यात आली आहे. यावेळी  बोलताना पवार म्हणाले, प्रभात टॉकिज, विजयानंद टॉकिज, गोखले हॉल, काँग्रेस भवन, एसएसपीएमएस कॉलेज, वानवडीचा शिंदे पॅलेस यासोबतच डेक्कन जिमखाना परिसरातील अनेक बंगले देखील नरहर पवार यांनी बांधले. याच पवारांनी सेवासदनमध्ये शिकणाऱ्या मुलींच्या शिक्षणासाठी देखील प्रयत्न केले. ग्रामीण भागातून पुण्यात शिकायला येणाऱ्या मुलांसाठी क्वार्टर्स बांधली. मात्र या पवारांनी इतक्या वास्तू पुण्यात बांधल्या तरी पुणेकरांनी 'पवारां'वर मेहरबानी दाखवली नाही, असा चिमटा पवारांनी काढला.