नवी दिल्ली : भारतातील महिला उद्योजक डिजिटायझेशनला लक्षणीय महत्त्व देत असल्याचे एका सर्वेक्षणातून समोर आले आहे. ‘गोडॅडी’च्या वतीने करण्यात आलेल्या जागतिक उद्योजकता सर्वेक्षणानुसार, ९७ टक्के महिला उद्योजकांनी त्यांच्या व्यवसायात डिजिटलायझेशनमुळे कार्यपद्धतीत मोठी सुधारणा झाल्याचे सांगितले.

विशेष म्हणजे, भारतात सर्वेक्षणात सहभागी महिलांपैकी ५१ टक्के या युवा उद्योजिका आहेत. कृत्रिम बुद्धिमत्ता (एआय) तंत्रज्ञानाचा व्यवसायाला फायदा होईल, असे मत ८८ टक्के महिला उद्योजकांनी व्यक्त केले. भारतातील उद्योजकतेच्या

भविष्याला नवा चेहरा देण्याची क्षमता या तंत्रज्ञानात आहे, असे त्यांचे मत आहे. ८२ टक्के महिलांनी येत्या तीन ते पाच वर्षांत व्यवसायवृद्धीची अपेक्षा व्यक्त केली असून, ५७ टक्के महिलांनी विविध बाजारपेठांपर्यंत पोहोचण्यावर भर देण्याचा मानस व्यक्त केला.

४७ टक्के उद्योजकांनी ग्राहकांसोबतचे संबंध दृढ करण्यावर लक्ष देणार असल्याचे सांगितले, तर ३८ टक्के महिलांनी सायबर सुरक्षा आणि डेटा सुरक्षा याबाबत उपाययोजना वाढवण्यावर भर देणार असल्याचे स्पष्ट केले.

डिजिटल तंत्रज्ञानामुळे लघुउद्योग क्षेत्राचे स्वरूप बदलत आहे. लघुउद्योग करणाऱ्या महिलांना आधुनिक तंत्रज्ञानाचा वापर करून ऑनलाइन क्षेत्रातही यश मिळवता यावे, यासाठी त्यांना सहज वापरता येतील अशी डिजिटल साधने उपलब्ध करण्यावर आमचा भर आहे.

- सेलिना बायबर, उपाध्यक्ष, ‘गो-डॅडी’च्या आंतरराष्ट्रीय बाजारपेठ विभाग