Maharashtra Budget 2023: राज्याचा अर्थसंकल्प आज मांडण्यात आला. हा अर्थसंकल्प राज्याचे अर्थमंत्री आणि उपमुख्यमंत्री देवेंद्र फडणवीस यांनी हा अर्थसंकल्प मांडला. यंदा राज्यात अर्थसंकल्प सादरीकरणाची एक नवी पद्धत त्यांनी आणली आहे.

यंदा पहिल्यांदाच राज्याचा अर्थसंकल्प हा आयपॅडवर वाचला गेला. अर्थमंत्री देवेंद्र फडणवीस यांनी ही नवी प्रथा सुरू केली आहे. यापूर्वी कागदावरच बजेट सादर करण्यात येत होतं. मात्र यंदाच्या वर्षी अर्थमंत्री देवेंद्र फडणवीस यांनी केंद्राचा आदर्श घेत डिजिटल वाट निवडली आहे.

काही दिवसांपूर्वी सादर झालेलं केंद्र सरकारचं बजेटही यंदा डिजिटली सादर करण्यात आलं. केंद्रीय अर्थमंत्री निर्मला सीतारामन यांनी २०२३-२४ वर्षीचं बजेट हे डिजिटल टॅब्लेटच्या साहाय्याने सादर केलं. गेल्या सलग दोन वर्षी केंद्रामध्ये अर्थसंकल्प हा पेपरलेस पद्धतीने सादर होत आहे.

केंद्रीय अर्थमंत्री निर्मला सीतारामन यांनी जुलै २०१९मध्ये पहिल्यांदाच अर्थसंकल्प सादरीकरणाच्या पारंपरिक पद्धतीला छेद दिला. आणि अर्थसंकल्प पेपरलेस पद्धतीने सादर केला. निर्मला सीतारामन यांनी अनेक वर्षांपासूनची, अगदी ब्रिटीश काळापासूनची परंपरा २०१९ साली मोडली. त्यांच्याच पावलावर पाऊल ठेवत आता देवेंद्र फडणवीस यांनीही महाराष्ट्रात या परंपरेला छेद दिला आहे.