महामुलाखत : पुष्प दुसरे! (ढिंग टांग!)

ब्रिटिश नंदी

Updated:२३ फेब्रुवारी, २०१८, ८:२६ PM

(अर्थात, पुन्हा सदू आणि दादू)

दादू : सदूऽऽऽ...
सदू : अंऽऽऽ...
दादू : अरे, मी भाऊ आहे ना तुझा?
सदू : हो, दादूराया!!
दादू : मग का रे असा वागतोस सूडकऱ्यासारखा?
सदू : आता काय केलं मी? रोजगाराच्या नवनव्या संधी शोधणाऱ्या माणसाला सूडकरी म्हणतात का?
दादू : तू जे काही पुण्यात केलंस, त्याला मराठी माणूस कदापि माफ करणार नाही !
सदू : महामुलाखतीबद्दल म्हणतो आहेस? पण ती तर उभ्या महाराष्ट्राला आवडली ! आचार्य अत्रे असते तर म्हणाले असते : गेल्या दहा हजार वर्षांत अशी मुलाखत झाली नाही !!
दादू : सकाळी उशिरा उठत होतास तेच बरं होतं ! तुझा घड्याळाचा गजर बंद कर पाहू !
सदू : तुझा नेमका आक्षेप कशाला आहे? मुलाखतीला की माझ्या घड्याळाच्या गजराला?
दादू : दोन्हीला ! सदूराया, तू लौकर उठायला लागल्यामुळे तुझा फावला वेळ हल्ली वाढला आहे !! वेळीच आवर स्वत:ला !!
सदू : माझ्या घड्याळाशी तुझं इतकं का वैर?
दादू : तुला काही वाटलं नाही का रे "त्यांची' मुलाखत घेताना?
सदू : कोणाची?
दादू : त्यांची ! मीसुद्धा नावं घेत नाही... त्यांच्यासारखीच!
सदू : वाटलं ना... आनंद वाटला ! दोन पिढ्यांमधला महासंवाद होता तो !!
दादू : काळीज नाही का रे तुला?
सदू : तुझ्या का इतकं पोटात दुखलं?
दादू : माझ्या हृदयात दुखलं ! पोटात नाही !! मुलाखतीचं म्हणशील तर दरवर्षी माझी मॅरेथॉन मुलाखत वर्तमानपत्रात तीन भागांत प्रसिद्ध होते !! तासभराच्या मुलाखतीनं माझ्या पोटात का दुखावं?
सदू : त्या मुलाखतीला काय अर्थ आहे? पुण्यात हजारो माणसांच्या साक्षीनं घेतली मी मुलाखत ! त्यासाठी भरपूर अभ्यास केला !
दादू : इतका अभ्यास आधी केला असतास तर व्यंग्यचित्रं काढण्याची वेळ आली असती का?
सदू : फोटो काढणाऱ्या माणसानं व्यंग्यचित्रांना हसू नये !
दादू : कसली तुझी ती मुलाखत ! आदल्या दिवशी पेपर फोडून परीक्षेला बसण्यात काय पॉइण्ट आहे?
सदू : रोज दरबारात हजर राहणाऱ्या माणसाला म्यारेथॉन मुलाखत घ्यायला लावून ती सलग स्वत:च्याच पेपरात छापण्यात तरी काय पॉइण्ट आहे?
दादू : मी तुझी मुलाखत चोरूनसुद्धा पाहिली नाही !
सदू : लोकांनी उघडपणे पाहिली ! चोरून पाहण्याच्या मुलाखती वेगळ्या असतात ! माझ्या मुलाखतीवर लोक फिदा आहेत, फिदा ! काल पुण्याच्या सुधीर गाडगीळांचाही फोन येऊन गेला... म्हणाले, तुम्ही ह्या धंद्यात उतरलात तर आम्ही कुठं जायचं?
दादू : ज्यांनी तुझ्या काकांना जेलात पाठवायचा घाट घातला, त्यांची मुलाखत घेतलीस ! कुठे फेडशील हे पाप? दोन पिढ्यांचा संवाद म्हणे !! हू: !!
सदू : होताच तो दोन पिढ्यांचा संवाद ! त्याचं किती टेन्शन आलं होतं मला !! जनरेशन ग्याप नावाची गोष्ट असतेच ना !!
दादू : दोन पिढ्यांचा संवाद साधायला तुला पुण्याला जावं लागलं? मुंबईत काय पिढ्या नाहीत?
सदू : मग मी कोणाची मुलाखत घ्यायला हवी होती?
दादू : आमच्या आदित्यची घ्यायचीस !! आम्ही सहा भागांत छापली असती !!
सदू : क्‍काय?
दादू : येस, आदित्यचीच ! दोन पिढ्यांमधला संवाद झालाच असता ना !!
सदू : मी ठेवतो फोन ! जय महाराष्ट्र!!

Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.

SCROLL FOR NEXT

महामुलाखत : पुष्प दुसरे! (ढिंग टांग!)

Also Read

IPL 2024 LSG vs RR : केएल शेर तर संजू सवा शेर! राजस्थानचा एक पाय प्ले ऑफमध्ये

DC vs MI : गोलंदाजीतली 'गळती' मुंबईच्या मुळावर; बॅटिंगमध्ये फर्स्ट क्लास तर बॉलिंगमध्ये नापास

Jolly LLB 3 : आता रंगणार जॉली विरुद्ध जॉली केस; सिनेमाच्या शूटिंगबाबत महत्त्वाची अपडेट आली समोर

CM Yogi Aadityanath : ''काशी अन् अयोध्येनंतर आता मथुरेकडे प्रस्थान...'' योगी आदित्यनाथांचे स्पष्ट संकेत