दादू : (गपचूप फोन फिरवत) म्यांव म्यांव !
सदू : मांजरं फार झालीत हल्ली महाराष्ट्रात ! छुत, छुत !!
दादू : (पटकन भानावर येत) सदूराया, अरे मी बोलतोय...!!
सदू : (सावध होत) मी कोण?
दादू : (भोळेपणाने) अरेच्चा, तू कोण हे तू मलाच विचारतोयस !!
सदू : (गोऱ्यामोऱ्या चेहऱ्यानं) वाईट विनोद होता !! पण मी ओळखला आवाज... बोल !
दादू : (अभिमानानं) त्याचं काय आहे की सध्या आमच्या चिरंजीवांनी प्लास्टिकबंदीचं मोठं कार्य हाती घेतलंय ! तुझा पाठिंबा हवा आहे !!
सदू : (कठोर आवाजात) मिळणार नाही !
दादू : (संयमानं) अरे, असं काय करतोस? किती महत्त्वाचा विषय आहे ! प्लास्टिकने पर्यावरणाची किती हानी होते माहितेय ना? चांगल्या कामाला नेहमी प्रोत्साहन द्यावं ! तुझ्या लाडक्‍या पुतण्यानेच प्लास्टिकविरोधी युद्ध छेडलं आहे आणि तू त्याला कुमक नाही पाठवणार? हे योग्य नाही !
सदू : ते पर्यावरणमंत्री रामदास कदम माझे पुतणे लागत नाहीत !
दादू : (समजूत घालत) त्यांचं जाऊ दे रे ! कधी नव्हेत ते त्यांना प्लास्टिकसारखी चमकायची संधी मिळतेय !! त्यांच्याकडे काय लक्ष देतोस? तुझा पुतण्या चि. विक्रमादित्य एकदा चौपाटीवर गेला होता, तर त्याला ढिगानं प्लास्टिक दिसलं ! त्याचा जीव कळवळला ! मला म्हणाला, बॅब्स, मी मुंबईचं पर्यावरण चकाचक करण्याचं ठरवलंय ! मी इतकं चांगलं काम केलं तर काका मला सपोर्ट करतीलच ना? मी म्हटलं, हो तर... कसाही असला तरी तुझा काका मनानं चांगला आहे !!
सदू : (संशयानं) ह्यात मला चापलुसीचा वास येतोय !
दादू : (डोळे मिटून गांभीर्यानं) हा प्लास्टिक जळाल्याचा वास आहे !!
सदू : (दचकून) छे...काहीतरीच !
दादू : (कार्यकर्त्याच्या उत्साहानं) गेल्या चार दिवसांत आम्ही शेकडो टन प्लास्टिक गोळा करून जाळलं !! सगळी मुंबई आणि महाराष्ट्र स्वच्छ झाला की मॅगसेसे पुरस्कारासाठी अर्ज करायचं ठरवतोय आम्ही !!
सदू : (हादरून) दादूराया... खरंच?
दादू : (फुशारकी मारत) आहेस कुठे? शिवाय दहा-बारा लाख रुपये दंडदेखील जमा केला !!
सदू : (धोरणीपणानं) प्लास्टिकबंदी करण्यापूर्वी आधी कचराकुंड्या उपलब्ध करून द्या !! प्लास्टिकला पर्याय द्या, मग करा तुमची ती बंदी !! उगीच काय गरीब जनतेला वेठीला धरायचं?
दादू : (थेट विचारत) तू अजूनही प्लास्टिकचा वापर करतोस?
सदू : (शास्त्रीय दृष्टिकोनातून) हे बघ दादूराया, प्लास्टिक वाईट नसतं, आपल्या सवयी वाईट असतात !!
दादू : (संशय बळकट होत) ह्याचा अर्थ तू प्लास्टिक वापरतोस !!
सदू : (समजूत घालत) मी काचसामानाचा विरोधक आहे !!
दादू : (बुचकळ्यात पडत) क्‍काय? काचसामानाचा?
सदू : (खुलासा करत) हं... करेक्‍ट... दिसली काच की खळळ्ळ !!
दादू : सद्या, सद्या...हे बरं नव्हे !! तुला काचेचं येवढं काय रे वावडं?
सदू : (प्रतिसवाल करत) तुला प्लास्टिकची एवढी का ॲलर्जी?
दादू : सदूराया, ह्या प्लास्टिकमुळे मुंबईत पावसाळ्यात पाणी तुंबतं ! मिठी नदीचा प्रवाह अडतो !! प्लास्टिक फार वाईट !
सदू : (खवळून) तुमची गटारं वाईट, तुमचे सफाई कंत्राटदार वाईट ! तुमचं प्रशासन वाईट, तुमचं ते हे...सगळंच वाईट !!
दादू : तुझा पर्यावरण संवर्धनाला विरोध आहे का ते आधी सांग !
सदू : (धुमसत) नाही !
दादू : (आश्‍चर्यानं) मग तुझा प्लास्टिकला विरोध का? आत्ताच्या आत्ता पाच हजार रुपये दंड भर !
सदू : (कपाळाला आठ्या...) मी कशाला दंड भरू? माझ्याकडे प्लास्टिक सापडलंय?
दादू : (खिजवत) पण मग तुझं रेल्वे इंजिन कशाचं आहे... आँऽऽ..!!