दहिवडी (जि. सातारा) : सध्या भयावह परिस्थिती असून, ऑक्‍सिजनअभावी अनेकांना आपल्या प्राणास मुकावे लागत आहे. पण, कुकुडवाड गटातील कोणावरही अशी वेळ येऊ नये, म्हणून देसाई उद्योग समूहाकडून आरोग्य विभागाकडे पाच ऑक्‍सिजन सिलिंडर सर्व मशिनसह मदत म्हणून देत आहोत, असे प्रतिपादन जिल्हा सहकारी बॅंकेचे संचालक अनिल देसाई यांनी केले. 

पुळकोटी (ता.माण) येथील प्राथमिक आरोग्य केंद्रास देसाई उद्योग समूहाकडून पाच ऑक्‍सिजन सिलिंडर सर्व मशिनसह मदत म्हणून देण्यात आले. त्याप्रसंगी श्री. देसाई बोलत होते. या वेळी तालुका वैद्यकीय अधिकारी डॉ. लक्ष्मण कोडलकर, वरकुटे मलवडीचे सरपंच बाळकृष्ण जगताप, जालिंदर खरात, तानाजी काळेल, जांभुळणीचे सरपंच भोजलिंग काळेल, शहाजी काळेल, गणेश माने, समीर ओंबासे, डॉ. योगेश कुलकर्णी, अजित काळेल आदी उपस्थित होते. देसाई म्हणाले,"" कोणीही आजार लपवू नका, योग्य उपचाराने हा आजार बरा होतो. ग्रामीण भागातील जनतेचे योग्य उपचार व सोयी-सुविधांअभावी हकनाक बळी जाऊ नयेत, म्हणून देसाई उद्योग समूहाकडून ऑक्‍सिजन सिलिंडरची मदत करण्यात आली आहे.''

नंदुरबारचे विनय गौडा साताऱ्याचे नवे सीईओ

डॉ. कोडलकर म्हणाले, "सध्या सर्वत्र ऑक्‍सिजन सिलिंडरचा तुटवडा आहे. त्यामुळे उपचार करताना आम्हाला मर्यादा येत आहेत. पण, देसाई कुटुंबीयांनी दिलेल्या मदतीमुळे रुग्णांवर उपचार करणे शक्‍य होणार आहे. या सिलिंडरच्या माध्यमातून एकावेळी किमान दहा रुग्णांवर या प्राथमिक आरोग्य केंद्रात उपचार करता येणार आहेत.'' या वेळी ग्रामस्थ, आरोग्य विभागाचे कर्मचारी उपस्थित होते. 

संपादन : बाळकृष्ण मधाळे