कऱ्हाड - नागपुरात एकाची ऑनलाइन झालेल्या फसवणूक प्रकरणात नागपूर पोलिसांनी आज शहरात छापे टाकले. कऱ्हाड पोलिसांच्या मदतीने झालेल्या कारवाईत एकाला चौकशीला ताब्यात घेतले आहे. कैफ इब्राहिम सय्यद (रा. सोमवार पेठ, कऱ्हाड) असे त्याचे नाव आहे. त्याच्या खात्यावरून लाखो रुपयांची उलाढाल झाल्याची माहिती तपासात पुढे आली आहे. त्यानुसार त्याला ताब्यात घेऊन पोलिस नागपूरला रवाना झाले आहेत.

ऑनलाइन फसवणूक प्रकरणात कैफचा अन्य राज्यातील भामट्यांशी संबंध असल्याने त्याच्या खात्याचा वापर केल्याचा पोलिसांचा संशय आहे. त्यानुसार कारवाई झाली आहे. ऑनलाइन फसवणुकीतील गुन्ह्याचा तपास करण्यासाठी नागपूर पोलिस काल रात्रीपासून येथे ठाण मांडून होते. आज सकाळी कऱ्हाड पोलिसांच्या मदतीने नागपूर पोलिसांनी त्याच्या राहत्या घरासह कार्यालयावर छापे टाकले. त्याला ऑनलाइन फसवणुकीच्या गुन्हा ताब्यात घेतले आहे.

नागपूर पोलिसांत दाखल गुन्ह्यातील फसवणुकीचे धागेदोरे कैफपर्यंत पोचल्याने त्या अनुषंगाने छापे टाकल्याचे पोलिसांनी स्पष्ट केले आहे. त्याच्या खात्यावर लाखो रुपयांची उलाढाल असल्याचे तपासात समोर आले आहे. त्याने या अगोदर ऑनलाइन फसवणूक केल्याचीही माहिती पोलिसांना दिली. ऑनलाइन फसवणुकीचे नेटवर्क परराज्यापर्यंत आहे. त्यामुळे कैफचा तपास महत्त्वाचा असल्याचे पोलिसांनी सांगितले. त्याच्याकडून आणखी काही गुन्हे उघडकीस येण्याची शक्यता व्यक्त होत आहे.