खटाव (जि. सातारा) ः गेल्या आठवड्यापासून पडत असलेला दमदार पाऊस हा उत्तर खटाव तालुक्‍यातील खरीप पिकांना पोषक ठरला आहे. सुरवातीच्या टप्प्यात पडलेल्या पावसानंतर अनेक दिवस पावसाने मारलेल्या दडीमुळे खरीप पिके धोक्‍यात आली होती. मात्र, गेल्या काही दिवसांपासून झालेल्या मुसळधार पावसामुळे आले, घेवडा, सोयाबीन, बटाटा, ऊस आदी पिकांना पोषक ठरला आहे. 

या वर्षी मॉन्सूनपूर्व पाऊस वेळेत झाल्याने शेतकऱ्यांनी लगबगीने पेरणी आटोपून घेतली. मात्र, पीक उगवून आल्यानंतर पावसाने ओढ दिली. उन्हाची तीव्रताही हळूहळू वाढू लागली. उन्हाळ्यासारखे ऊन पडू लागल्याने पिके करपण्याच्या अवस्थेत पोचली. स्वाभाविकच शेतकरी चिंतेत आला होता. त्यात भरीस भर अनेक गावांत सोयाबीन पिकावर दुबार पेरणीचे संकट ओढवले आहे. योग्य प्रतीचे बियाणे उपलब्ध न झाल्याने त्याचा फटका सहन करावा लागल्याची शेतकऱ्यांतून चर्चा होत आहे. शिवाय टाळेबंदीमुळे मालवाहतुकीला बंदी असल्याने अनेक शेतकऱ्यांचा कांदा जागेवरच सडला. अशा एक ना अनेक चक्रव्यूहातून जात असताना शेतकऱ्यांना नक्की करावे तरी काय, असा प्रश्न पडला होता. 

गेल्या आठवड्यापासून तालुक्‍यातील अनेक गावांत दोन- दोन तास मुसळधार पाऊस झाला. ओढे, नाले तुडुंब भरून वाहिले. जलसंधारणाद्वारे झालेले बंधारे भरून वाहिले. या पावसाने खरिपातील सर्व पिकांना जीवदान मिळाले आहे. पावसाने वेळत लावलेल्या हजेरीमुळे पिकांना नवसंजीवनी मिळाल्याने शेतकरी हरकून गेला. हा पाऊस सोयाबीन, घेवड्यासारख्या कोरडवाहू पिकांना चांगला फायदेशीर झाला आहे. अनेक गावांत सोयाबीन व घेवड्याची कोळपणी सुरू असल्याचे दिसत आहे.

चीनमधील आयात बंदीनंतर कोरेगावचा राजमा देशात खाणार भाव