महाबळेश्वर (जि. सातारा) : येथील नगरपालिकेपाठोपाठ आता पोलिस ठाण्यात कोरोनाचा शिरकाव झाला आहे. येथील पोलिस ठाण्यातील पाच कर्मचाऱ्यांचे कोरोना तपासणीचे अहवाल पॉझिटिव्ह आल्याने कोरोनाची लागण झालेल्या पोलिस कर्मचाऱ्यांची संख्या आता सात झाली आहे. दरम्यान, ठाण्यातील सर्वच पोलिस कर्मचाऱ्यांची कोरोना तपासणी करण्यात येणार असल्याची माहीती पोलिस निरीक्षक बी. ए. कोंडुभैरी यांनी दिली.

तालुक्‍यात कोरोनाचा कहर सुरूच आहे. रोज कोरोनाचे रुग्ण वाढत असून, शहराला कोरोनाचा विळखा अधिक घट होताना दिसत आहे. शहरात विनाकारण फिरणारे कमी झाले असले, तरी बंद झाले नाहीत. त्यामुळे अशा बेजबाबदार नागरिकांसाठी पालिका, महसूल व पोलिस विभागाचे कर्मचारी रस्त्यावर उतरून कोरोनाबरोबर युद्ध करीत आहेत. नागरिकांच्या संपर्कात आल्याने मागील आठवड्यात पालिकेतील तीन कर्मचाऱ्यांना कोरोनाची बाधा झाली होती. त्यापाठोपाठ दोन पोलिस कर्मचारी कोरोनाबाधित झाले होते.

कोरोना तपासणी अहवालानुसार पोलिस ठाण्यातील पाच कर्मचाऱ्यांचे कोरोना तपासणीचे अहवाल पॉझिटिव्ह आले आहेत. त्यामुळे कोरोनाची बाधा झालेल्या पोलिस कर्मचाऱ्यांची संख्या आता सात झाली आहे. कोरोनाची लागण झालेल्या पोलिस कर्मचाऱ्यांची संख्या वाढू लागल्याने पोलिस विभागातून चिंता व्यक्त केली जात आहे. खबरदारीचा उपाय म्हणून पोलिस ठाण्यातील सर्वच पोलिस कर्मचाऱ्यांची कोरोना चाचणी करण्यात येणार असल्याची माहिती पोलिस निरीक्षक बी. ए. कोंडुभैरी यांनी दिली.

दरम्यान, मोकाट फिरणाऱ्या नागरिकांवर दंडात्मक कारवाई करण्यासाठी पोलिस निरीक्षक कांडुभैरी हे स्वतः रस्त्यावर उतरले आहेत. त्यांनी शनिवारी अशाच मोकाट फिरणारे 11 बेजबाबदार नागरिकांवर दंडात्मक कारवाई केली. लॉकडाउनचे नियम पाळून प्रशासनाला सहकार्य करा, असे आवाहनही त्यांनी नागरिकांना केले आहे.

महाबळेश्‍वरात अनधिकृत बांधकाम कारवाईत दुजाभाव; प्रशासन नेमकं कोणावर मेहेरबान?