कऱ्हाड : युवतीशी प्रेमसंबंध (love Affair) असल्याच्या संशयावरून एका युवकावर कोयत्याने हल्ला करण्यात आला. त्याबाबत पोलिसात गुन्हा नोंद झाला आहे. येथील उर्दू शाळेमागे (Urdu School) दरवेशी गल्लीत काल रात्री साडेआठच्या सुमारास घटना घडली. रवी हणमंत पुजारी (रा. दरवेशी गल्ली) असे जखमी युवकाचे नाव आहे.

याबाबत कऱ्हाड शहर पोलिसांनी दिलेली माहिती अशी, की दरवेशी गल्लीतील रवी पुजारीचे एका युवतीशी प्रेमसंबंध असल्याचा संशय सद्दाम हुसेन शेख याच्या मनात होता. त्यावरून काल रात्री सद्दाम रवीच्या घरी गेला. तुझ्याकडे काम आहे, तू माझ्यासोबत चल, असे म्हणून त्याला घरापासून थोड्या अंतरावर घेऊन गेला.

तेथे थेट शिवीगाळ, दमदाटी करीत मारहाण करण्यास सुरुवात केली. तुला जिवंत सोडत नाही, असे म्हणून शेखने त्याच्याजवळील कोयत्याने हल्ला केला. त्यामध्ये रवी गंभीर जखमी झाला. घटना पाहून परिसरातील नागरिकांनी तेथे धाव घेतली. त्यांनी जखमी रवीला रुग्णालयात दाखल केले. याबाबत शारदा पुजारी यांनी पोलिसात फिर्याद दिली आहे. त्याबाबत पोलिसात गुन्हा दाखल करण्यात आला आहे.