Apple In India : अॅपल इंडिया भारतात आपला व्यवसाय वाढवण्याचा तयारीत आहे. यासाठी अॅपलने नुकतीच बेंगळुरूमध्ये एक बिजनेस बिल्डिंग 10 वर्षांच्या भाडेतत्त्वावर घेतली आहे. याआधी अॅपलने भारतातील पहिलं स्टोअर मुंबईत उघडलं आहे.

अॅपल बेंगळुरूमधील भाडेतत्त्वावरील बिल्डिंगसाठी दरमहा कोट्यवधी रुपये मोजणार आहे. अॅपलने बंगळूर मधील पॉश भागात असलेल्या प्रेस्टिज अॅसेट्स नावाच्या बिल्डिंग मधील अनेक मजले भाड्याने घेतले आहेत. ज्यासाठी कंपनी करोडो रुपये भाडे देणार आहे.

इतके भाडे द्यावे लागणार

भारतात अॅपलचं स्टोअर आणि ऑफिस सुरू झाल्याने भारतातील लोकांना अॅपलची उत्पादने खरेदी करण्यासाठी परदेशावर अवलंबून राहावे लागणार नाही. डेटा अॅनालिटिक्स फर्म प्रॉपस्टॅकच्या मते, ऍपलने प्रेस्टिज अॅसेट्स प्रकल्पाच्या इमारतीचा चौथा, सहावा, सातवा, आठवा आणि नववा मजला 10 वर्षांसाठी भाड्याने घेतला आहे.

यासाठी अॅपल दरमहा 2.43 कोटी रुपये भाडे देणार आहे. याशिवाय कार पार्किंगसाठी प्रत्येक महिन्याला 16.56 लाख रुपये द्यावे लागणार आहेत. अॅपल इंडिया आणि प्रायव्हेट मुसा सैत वक्फ यांच्यात हा करार झाला आहे.

3 वर्षानंतर भाडं बदलणार

भाडे कराराप्रमाणे, अॅपलचे भाडे 3 वर्षांनी वाढेल. कराराच्या अटींनुसार, कराराचा लॉक-इन कालावधी पाच वर्षांचा असेल आणि भाडे दर तीन वर्षांनी 15% वाढेल. त्याचबरोबर या लीजची खास बाब म्हणजे अॅपलच्या कोणत्याही स्पर्धक कंपनीला या इमारतीत जागा दिली जाणार नाही.

भारतातील पहिले अॅपल स्टोअर मुंबईत सुरू

कंपनीने नुकतेच मुंबईत भारतातील पहिले स्टोअर उघडले आहे. यासाठी कंपनीने जिओ वर्ल्ड ड्राईव्ह मॉलमधील शॉप 133 लीजवर घेतले आहे. यासाठी कंपनी दरमहा 42 लाख रुपये भाडे देणार आहे.