जकार्ता : भारताच्या रोहन बोपण्णा आणि दिविज शरण या जोडीने आशियाई स्पर्धेत टेनिस दुहेरीत सुवर्ण पदक पटकावले. कझाकिस्तानच्या अॅलेक्सझॅंडर बुबलिक आणि डेनिस येव्हसेयेव या जोडीवर त्यांनी 6-3,6-4 सहज विजय मिळवला. भारताचे हे आजच्या दिवसातील दुसरे सुवर्ण पदक आहे.  

पहिला सेट 6-3 असा सहज जिंकल्यानंतर दुसऱ्या सेटमध्ये प्रतिस्पर्ध्यांनी 2-2 अशी बरोबरी साधली मात्र शेवटच्या क्षणी खेळ उंचावत बोपण्णा-शरणने 6-4 असा विजय मिळवला. 

18व्या आशियाई स्पर्धेतील टेनिसमधील हे पहिलेच सुवर्ण पदक आहे. लिअॅंडर पेसने अचानक घेतलेल्या माघारीमुळे भारतीय टेनिस संघाच्या कामगिरीवर प्रश्नचिन्ह उभे राहिले होते. मात्र बोपण्णा- शरण या जोडीने उत्तम खेळ करत भारताला सुवर्ण पदक मिळवून दिले.