घणसोली (नवी मुंबई ): घनदाट जंगलातून जाणारी पायवाट, पक्ष्यांचा किलबिलाट, उंचावरून कोसळणारा फेसाळलेला धबधबा, हिरवाईने नटलेला डोंगर असे वर्णन केले तर मुंबईपासून दूर असे ठिकाण डोळ्यांसमोर उभे राहते. मात्र, असाच परिसर नवी मुंबई शहरातही आहे. घणसोली शहराच्या पूर्व सीमेवर कल्याण आणि नवी मुंबईच्या मध्यभागी ‘घणसोलीचा वॉटरफॉल’ म्हणजेच ‘गवळीदेव धबधबा’आहे. गवळीदेव धबधब्याला येथील नागरिक ‘घणसोली टेकडी’ही म्हणतात.

नवी मुंबईतील घणसोलीजवळील गवळीदेव धबधबा पर्यटनस्थळाचे वर्णन करण्यास शब्दही अपुरे पडावे, असा निसर्गसौंदर्य या परिसराला लाभला आहे. एका बाजूला औद्योगिक परिसर असल्याने या ठिकाणी धबधबा असेल, असे कुणाला वाटणारही नाही. पण, हा डोंगर जसजसा वर चढत जातो, तसतशी येथील निसर्गसौंदर्याने नटलेल्या वनराईचे दर्शन होत जाते. काहीसा डोंगर चढल्यानंतर समोर दिसतो तो उंच कड्यावरून कोसळणारा फेसाळलेला धबधबा. या धबधब्यावर येण्याचा सर्वोत्तम वेळ पावसाळ्यात असतो. अन्यथा, इतर ऋतुमध्ये हा धबधबा एक शांत टेकडी म्हणून ओळखली जाते. हिवाळा आणि उन्हाळ्यात सभोवतालचे जंगल क्षेत्र फिरता येऊ शकते.

गवळीदेव धबधबा अर्थात घणसोली टेकडीवर एक लहान गवळी-देव मंदिर आहे. त्याच्याजवळच पिकनिक स्पॉट आहे. या ठिकाणावरील सर्वांत मोठा धबधबा मंदिराच्या अगदी खाली उगम पावतो. मंदिरापर्यंतचा मार्ग अतिशय सोपा आणि सुंदर आहे. काही कुटुंब सहसा मंदिर ठिकाणी राहतात. ते कुटुंब मासेमारी करतात आणि गोड्या पाण्यातील खेकडे पकडतात. घणसोली टेकडीवरील सर्वांत चांगला भाग मंदिरानंतर सुरू होतो. घनदाट जंगल, दोन्ही बाजूला उंच उंच व डेरेदार वृक्ष आणि पक्ष्यांचा किलबिलाट यामुळे पायवाटेने चालताना एक वेगळीच मजा येते.