बिहारमधील पटना रेल्वे स्टेशनवरील सूचना देणाऱ्या स्क्रीनवर पॉर्न व्हिडिओ क्लीप लागल्याची घटना घडली होती. तब्बल तीन मिनीटे ही क्लीप प्ले केली गेली होती. त्यानंतर या प्रकरणाची चर्चा जगभर झाली होती. त्याच पार्श्वभूमीवर दिल्ली मेट्रोत हरियाणवी गाणं लागल्याची घटना घडली आहे.

या प्रकरणाचा व्हिडिओ सोशल मीडियावर व्हायरल झाला असून त्यामध्ये मेट्रोत लोकं प्रवास करत असताना अचानक हरियाणी भाषेतील गाणं लागलं आहे. मेट्रोमध्ये स्टेशनच्या सूचना देण्यासाठी साऊंड लावलेले असतात. त्यामधून येणाऱ्या स्टेशनसंदर्भात आणि इतर सुरक्षेसंदर्भात प्रवाशांना सूचना दिल्या जातात.

पण याऐवजी प्रवाशांना हरियाणवी गाणं ऐकायला आल्यामुळे सर्व प्रवाशी आश्चर्यचकित झाले होते. या घटनेचा व्हिडिओ सोशल मीडियावर चांगलाच शेअर केला जात आहे.

दरम्यान, या व्हिडिओला सध्या नेटकऱ्यांकडून पसंती मिळत असून अनेकांनी या व्हिडिओला लाईक केलं आहे. त्याचबरोबर या व्हिडिओवर अनेक नेटकऱ्यांनी मजेशीर कमेंट केल्या आहेत.