जळगाव - गेल्या दहा- पंधरा दिवसांपासून सर्वत्र थंडीची लाट आली होती. या दरम्यान जळगाव जिल्ह्यातील पारा ४ अंश सेल्सिअसवर पोहोचला होता. मध्यंतरी दोन- तीन दिवस थंडीचा जोर कमी झाला होता. मात्र, काल रात्रीपासून अचानक थंडीची लाट परतल्याने जळगावचा पारा ९ अंशांवर आला आहे. दिवसभर गार वाऱ्यांमुळे थंडी अधिक जाणवत होती.

जम्मू- काश्‍मीर, उत्तराखंड व हिमाचल प्रदेशात हिमवृष्टी होण्यास सुरवात झाल्याने उत्तर भारतात दोन दिवसांपासून पुन्हा थंडीची लाट परतली आहे. उत्तर भारतातील थंडीचा प्रभाव रात्रीपासून जाणवू लागला आहे. यामुळे मध्यंतरी दोन- तीन दिवस गायब झालेली थंडी पुन्हा परतली आहे.

पहाटेपासूनच गार वारे वाहत असल्याने थंडीचे प्रमाण अधिकच जाणवत आहे. दिवसभर थंडीच जाणवत असल्याने ठिकठिकाणी शेकोट्या पेटविण्यात आल्या होत्या. दिवसाही गार वारे सुरू आहे. मध्यंतरी दोन- तीन दिवस दुपारी काहीशी उष्णता वाढली होती. तसेच अंशतः ढगाळ वातावरण होते. आज देखील दुपारच्यावेळी ढगाळ वातावरण होते. तरीही थंडीचे प्रमाण वाढल्याचा अनुभव आज आला.