नगरसूल - सध्या पेरणीचा हंगाम सुरू असून मकावर लष्करी आळीचा हल्ला होत आहेत. यामुळे शेतकरी बियाण्यांना कीटकनाशके लावून लागवड करत आहेत मात्र हेच बियाणे खाल्ल्याने नगरसूल येथे एका मोराला आपला प्राण गमवावा लागला आहे.

येथील लहीत रस्त्यालगत बोरसे वस्ती शेजारील साहेबराव रामभाऊ शिंदे यांच्या शेतात झाडा खाली मृत अवस्थेत  मोर कामाला गेलेल्या महिलांना दिसला. मृत अवस्थेत मोराचे सौंदर्य जवळू पाहील्यावर ह्या  महिलाचा कंठ दाटून आला. त्यांनी शेजारीच असलेल्या प्रल्हाद शिंदे यांना बोलावले. त्यांनीही  मोर हलविला पण त्याचा मृत्यु झाल्याचे लक्षात आले. त्यांनी संतोष कुडके,भाऊलाल कुडके यांना झालेल्या घटनाची माहीती दिली. त्यांनी तात्काळ येवला वनविभागासी संपर्क साधून वनपरिक्षेत्र अधिकारी संजय भंडारी यांना माहीती दिली असता वनपाल मोहन पवार,सरपंच प्रसाद पाटील,वनरक्षक गोपाळ हारगावकर वनरक्षक, विकास देशमुख आदी काही वेळेत हजर झाले. 

सध्या पेरणीचे दिवस असल्याने शेतात शेतकरी बियाणे पेरतो हे बियाणे विषारी औषधे लावलेले असल्याने  हे पक्षी खातात मग असा प्रकार होवू शकतो. मोराचा मृत्यु नेमका कशाने झाला हे अहवाल आल्यावर समजेल असे भंडारी म्हणाले.