नाशिक - पालकमंत्री गिरीष महाजन यांच्या समवेतची काल (ता. २०) रात्रीची चर्चा फिसकटल्यावर आज सकाळी किसान सभेच्या लाँग मार्चने मुंबईच्या दिशेने कूच केली. हा लाँग मार्च विल्होळीच्या पुढे येताच पुन्हा मागण्यांबाबत वाटाघाटी सुरू झाल्या आहेत. रात्री उशिरापर्यंत त्या सुरू होत्या. 

महाजन, पर्यटनमंत्री जयकुमार रावल यांच्यासह आमदार जे. पी. गावित, डॉ. अशोक ढवळे, डॉ. अजित नवले, माजी आमदार नितीन भोसले यांची सायंकाळपासून अदिवासी शेतकऱ्यांच्या मागण्यांबाबत चर्चा सुरू झाली. आंदोलनकर्त्यांना माळरानावर थांबविण्यात आले आहे. 

दरम्यान, विल्होळी जवळ माजी उपमुख्यमंत्री छगन भुजबळ यांनी आंदोलनकर्त्यांची भेट घेऊन महाराष्ट्राच्या हक्काचे पाणी जाऊ देणार नाही, असा इशारा दिला. महाराष्ट्राचे हक्काचे पाणी अडविण्यासाठी निधीची जरी अडचण आली तरी पाण्यावरचा हक्क सोडू नये, अशी आग्रही मागणी भुजबळ यांनी केली.

सरकारने मागण्यांबाबत लेखी आश्‍वासन द्यावे, आश्‍वासनावर समाधान झाल्यास लाँग मार्चचा विचार केला जाईल, अन्यथा हा लाँग मार्च मुंबईच्या दिशेने निघेल, असा इशारा आमदार गावित यांनी दिला आहे. त्यामुळे सरकारचे वाटाघाटी यशस्वी करण्यासाठी प्रयत्न सुरू आहेत.