इंदिरानगर(नाशिक)- आज (ता.27) दुपारी 12 वाजेच्या सुमारास पाथर्डी फाटा भागातील दामोदर नगर मध्ये अचानक रानगवा आढळल्यामुळे लोकांची पळापळ झाली.  बिबट्यांची सवय असलेल्या वन विभागाच्या कर्मचाऱ्यांनी देखील पहिल्यांदाच रानगवा दिसल्याने आश्चर्य व्यक्त केले आहे.

दुपारी या भागातील जाचक मळा येथील दर्शन सोसायटी आणि शिव पॅलेस येथील नागरिकांना हा रानगवा दिसला. सुरुवातीला रेडा असेल म्हणून कोणी लक्ष दिले नाही. मात्र त्याचे स्वरूप बघून एक-दोघांनी हा रानगवा असल्याचे सांगितल्याने सर्वांची पंचायत झाली आणि एकच पळापळ सुरु झाली.

दरम्यान नागरिकांनी भाजपचे येथील पदाधिकारी एकनाथ नवले यांनी कळवले. त्यांनी तातडीने वनविभागाला याची माहिती दिली. यादरम्यान बाजार समितीचे अध्यक्ष शिवाजी चुंबळे यांचे चिरंजीव प्रताप आणि पुतणे संतोष येथे आले आणि त्यांनी हा सकाळी त्यांच्या गौळाने येथील घराजवळ बघितल्याचे सांगितले. पाथर्डी मार्गे तो नागरी वस्तीत झाल्याचा अंदाज व्यक्त केला जात होता. विल्होळी येथील श्याम मते यांनी देखील त्यांच्या घराच्या गेटजवळ त्याला काल ता. 26 ला रात्री बघितल्याचे सांगितले.

वनपाल रविंद्र सोनार, वनरक्षक विजय पाटील, जी. बी पंढरे, अशोक पाळदे आणि टीमने मात्र पहिल्यांदाच या भागात रानगवा पाहिल्याचे सांगत आश्चर्य व्यक्त केले.