जळगाव - शहरातील मेहरुण परिसरातील रामनगर येथील कीर्ती पवन दुसाने (वय १७) या दहावीच्या विद्यार्थिनीने राहत्या घरात ओढणीने गळफास घेऊन आत्महत्या केली. ही घटना आज दुपारी दोनच्या सुमारास घडली. आत्महत्येचे नेमके कारण कळू शकले नाही.

रामनगर येथील पवन दत्तात्रय दुसाने सराफ बाजारात कारागीर म्हणून काम करतात. पत्नी भारती एमआयडीसी कंपनीत मजूर म्हणून कामाला जाते. मोठी मुलगी कीर्ती ही रामनगरातील श्रीराम कन्या शाळेत दहावीला तर लहान मुलगा लोकेश हा आठवीत शिकतो. मंगळवारी पती-पत्नी दोघेही नेहमीप्रमाणे कामाला गेले, तर लोकेश व कीर्ती शाळेत न गेल्याने दोघे घरीच होते.

लोकेश व कीर्ती यांनी दुपारी सोबत जेवण केले. जेवणानंतर लोकेश खेळायला निघून गेला. तासाभरानंतर खेळून आल्यावर आतून बंद असलेला दरवाजा ठोकला. मात्र, आतून प्रतिसाद न मिळाल्याने त्याने खिडकी उघडली. त्याला कीर्तीने गळफास घेतल्याचे दिसले. आरडाओरड करीत नागरिकांच्या मदतीने दरवाजा उघडला. लहान भावासह तिच्या आई-वडिलांनी घरी आल्यावर हंबरडा फोडला. रुग्णालयात आक्रोश केला. दरम्यान, नगरसेवक गणेश सोनवणे यांनी तातडीने जिल्हा रुग्णालय गाठून कीर्तीच्या आई, वडिलांना धीर दिला. उपनिरीक्षक राजकुमार ससाणे, देविदास सूरदास यांनी पंचनामा केला. मोबाईलवर बोलत असताना तिने जोरात मोबाईल फेकून घर बंद केले अन आत्महत्या केली, असे शेजाऱ्यांनी यावेळी सांगितले.