नाशिक - ‘कौन बनेगा करोडपती’तून बोलत असून, २५ लाख रुपयांची लॉटरी लागल्याची बतावणी केली आणि लॉटरीची रक्कम मिळविण्यासाठीच्या प्रक्रियेसाठी तब्बल २ लाख ८६ हजार रुपयांची रक्‍कम उकळून महिलेची फसवणूक केल्याचा प्रकार उघडकीस आला. याप्रकरणी नाशिक सायबर पोलिसांत गुन्हा दाखल करण्यात आला. 

महिलेच्या तक्रारीनुसार, त्यांना गेल्या ७ जुलै रोजी त्यांच्या मोबाईल क्रमांकावर ००१२८९२७२१११० या क्रमांकावरून दूरध्वनी आला. संशयिताने ‘कौन बनेगा करोडपती से बात कर रहा हूँ, बधाई हो, आपको २५ लाख रुपयोंकी लॉटरी लगी है’ असे सांगितले. लॉटरीचे पैसे पाहिजे असल्यास त्यासाठी रजिस्ट्रेशन फी १६ हजार ५०० रुपये भरावे लागतील. अरुण कुमार नाव असलेल्या या खात्यावर पीडितेने ही रक्कम ऑनलाइन जमा केली. त्यानंतही मागणीनुसार पीडित महिलेने ५०० रुपये, ७९ हजार ५०० रुपये, १ लाख ९० हजार रुपये असे एकूण २ लाख ८६ हजार ५०० रुपये जमा केले. मात्र त्यानंतरही संशयितांकडून पैशांची मागणी होत असल्याने त्यांना संशय आल्याने त्यांनी तक्रार दिली.