स्विफ्ट गाडीसह बासठ्ठ किलो गांजा जप्त, तीन संशयीत ताब्यात,गुन्हे शाखा युनिट एकची कामगिरी

म्हसरूळ (नाशिक) - स्विफ्ट गाडीतून गांजा शहरात विक्री करण्यासाठी आणणाऱ्या तीन संशयितांना गुन्हे शाखा युनिट एकने तपोवनातील जलशुद्धीकरण केंद्राजवळ जेरबंद करण्यास यश आले. या संशयितांकडून स्विफ्ट गाडीसह बासठ्ठ किलो गांजा असा एकूण आठ लाख दहा हजारांचा मुद्देमाल जप्त करण्यात आला आहे.

  गुन्हे शाखा युनिट एकचे पोलीस उपनिरीक्षक बलराम पालकर यांना काही संशयीत नाशिक शहरात गांजा विक्री करण्यासाठी घेऊन असल्याचे समजले. त्याअनुषंगाने गुन्हे शाखा युनिट एकचे वरिष्ठ पोलीस निरीक्षक आनंद वाघ यांच्या मार्गदर्शनाखाली सहायक पोलिस निरीक्षक महेश कुलकर्णी ,पोलीस उपनिरीक्षक बलराम पालकर ,सहायक पोलीस उपनिरीक्षक कारवाळ,पोलीस हवालदार संजय मुळक,वसंत पांडव,दिघोळे, येवाजी महाले,बागुल ,पोलीस नाईक शांताराम महाले,पोलीस शिपाई गणेश वडजे,विशाल काठे,दिपक मोंढे, महिला पोलीस शिपाई पोखरकर यांनी सापळा रचुंन संशयीत धनराज पवार (रा.निफाड),युवराज मोहिते (रा.विडीकामगार नगर,आडगाव),प्रशांत नारळे (रा.कुमावत नगर,पंचवटी) यांना तपोवनातील जलशुद्धीकरण केंद्राजवळ स्विफ्ट क्रमांक एमएच१२एफयु४०२० सह जवळपास बासठ्ठ किलो गांजा असा एकूण आठ लाख दहा हजार रुपयांचा मुद्देमाल ताब्यात घेतला आहे.याप्रकरणी आडगाव पोलीस ठाण्यात गुन्हा दाखल करण्यात आला असून पुढील तपास पोलीस करीत आहेत.