अमळनेर : महत्वाकांक्षी प्रकल्प पाडळसे धरणाच्या पूर्ततेसाठी शेतकऱ्यांनी वज्रमूठ बांधली आहे. या पार्श्‍वभूमीवर पाडळसे जनआंदोलन समितीतर्फे आज सकाळी अकराला रणरणत्या उन्हात विराट मूकमोर्चा काढण्यात आला. अमळनेरसह पारोळा, चोपडा, धरणगाव व धुळे जिल्ह्यातील शेतकरी मोठ्या संख्येने सहभागी झाले आहेत. यात अनेक संघटना, पक्षांच्या पदाधिकाऱ्यांनीही सहभाग घेतला आहे. या पार्श्‍वभूमीवर शहरात कडकडीत बंद पाळण्यात आला असून, बाजारपेठातील सर्व दुकाने बंद आहेत. 
प्रताप मिल कंपाऊंडपासून मोर्चा सुरवात झाली असून, सुभाष चौक, दगडी दरवाजा, बसस्थानक, विश्रामगृह चौकातून तहसील कार्यालयावर मोर्चा नेण्यात आला आहे. ठिकठिकाणी पाडळसे जनआंदोलन समितीचे बॅनर लावण्यात आले आहे. गेल्या अनेक दिवसापासून मोर्चात सहभागी होण्यासाठी व्यापक जनजागृती करण्यात आली होती. या पार्श्‍वभूमीवर भाजीपाला बाजार, सराफ बाजार, दाणा बाजार, गंगाघाट, बसस्थानक परिसरातील सर्व दुकाने बंद ठेवण्यात आली आहेत. मोर्चाच्या पार्श्‍वभूमीवर शहरात कडेकोट बंदोबस्त लावण्यात आला आहे. ठिकठिकाणी शेतकऱ्यांच्या सोयीसाठी अनेक संघटनांकडून थंड पाण्याची व्यवस्थाही करण्यात आली आहे. तहसील आवारात मोर्चा आल्यावर एका सभेत मोर्चाचे रूपांतर झाले.