जळगाव : जिल्ह्यात यंदा समाधानकारक पाऊस होत असून, सप्टेंबर महिन्यातही मुक्काम वाढला आहे. त्यामुळे जिल्ह्यात आता ओल्या दुष्काळाची शक्‍यता व्यक्त होत आहे. सप्टेंबर पूर्ण झालेला नसताना जिल्ह्यात पावसाच्या सरासरीने 110 टक्‍क्‍यांचा आकडा गाठला आहे. 
वरुणराजाने यंदा जळगाव जिल्ह्यासह संपूर्ण महाराष्ट्रावरच कृपा केली आहे. मराठवाडा वगळता सर्वत्र चांगला पाऊस होत असून, सप्टेंबर महिना संपत आल्यानंतरही पावसाचा मुक्काम कायम आहे. जळगाव जिल्ह्यात तर आतापर्यंत पावसाच्या सरासरीने शंभरी केव्हाच गाठली असून, 110 टक्‍क्‍यांपेक्षा अधिक पाऊस झाला आहे. 
बुधवारी जिल्हाभरात हजेरी लावल्यानंतर शुक्रवारीही सकाळपासूनच जळगाव शहरासह जिल्ह्यातील अनेक भागात दमदार पाऊस झाला. जामनेर तालुक्‍यातील काही भागात मुसळधार पाऊस झाल्याने वाघूर नदीला चांगले पाणी आले, त्यामुळे वाघूर धरणाचा साठाही शंभर टक्‍क्‍यांपर्यंत पोचण्याकडे वाटचाल सुरू झाली आहे. जिल्ह्यातील अन्य भागातही पावसाने चांगली हजेरी लावली. 

18 सप्टेंबरचा पाऊस 
तालुका------ पाऊस--- टक्के 
जळगाव ---- 5.8-----96.4 
जामनेर-------13.4----109.2 
एरंडोल------9.0------116.9 
धरणगाव------19.1----98.5 
भुसावळ -----3.6-----114 
यावल-------6.7-----119 
रावेर--------14.4---131.1 
मुक्ताईनगर---5.0----100.3 
बोदवड------14.7----110.9 
चाळीसगाव---31.1----87.3 
पाचोरा------14.7----104.7 
भडगाव-----33.8----100.3 
अमळनेर----10.3----106.1 
पारोळा-----28.9----108.7 
चोपडा------30.1---110.8