जळगाव : भारतीय जनता पक्ष त्यांच्या पक्षाचे नेते एकनाथ खडसे यांना न्याय देऊ शकला नाही, तो पक्ष तुम्हाला काय न्याय देईल, त्यामुळे त्यांच्यावर विश्‍वास ठेवू नका, शिवसेनेलाच मतदान करा, असे आवाहन राज्याचे सहकार राज्यमंत्री व शिवसेना उपनेते गुलाबराव पाटील यांनी केले. शहरातील हुडको व हरिविठ्ठलनगरात आज शिवसेनेच्यावतीने जाहीर सभेचे आयोजन केले होते. 
प्रभागाच्या प्रचारासाठीच्या सुरेशदादा जैन यांच्या मार्गदर्शनातील जाहीर सभेला सहकार राज्यमंत्री गुलाबराव पाटील, मुंबई येथील शिवसेनेचे उपनेते हाजी आराफत शेख, आमदार चंद्रकांत सोनवणे, आमदार किशोर पाटील, जवळेकर महाराज, आर. ओ. पाटील, अनिल अडकमोल, गजानन मालपुरे, राजू मोरे उपस्थित होते. हुडको व हरिविठ्ठलनगरातील प्रचार सभेत बोलताना सहकार राज्यमंत्री गुलाबराव पाटील यांनी भाजपवर जोरदार टीकास्त्र सोडले, ते म्हणाले की एका वर्षात विकास घडविण्याचे आश्‍वासन देणारा हा पक्ष विश्‍वासार्ह नाही. त्यांच्याच पक्षाचे नेते खडसे यांना हा पक्ष न्याय देऊ शकलेला नाही, तुम्हाला काय न्याय देणार. त्यामुळे त्यांच्या भूलथापांना बळी पडू नका, असे आवाहनही त्यांनी केले. यावेळी माजी मंत्री सुरेशदादा जैन यांनी रस्ते, शाळा, हॉस्पिटल, पाणी, अशा सर्व पायाभूत मूलभूत सेवासुविधा जनतेला मिळवून देण्यासाठी आम्ही चाळीस वर्षांपासून वचनबद्ध होतो व भविष्यातही राहणार असल्याचे त्यांनी सांगितले. सभेला मतदारांची मोठ्या प्रमाणावर उपस्थिती होती.