येवला : काठेवाडी,पंजाब व माळवा जातीचे भारदास्त देहयष्टी, नखरेबाजपणा अन रुबाबदार असे लक्ष्मी, बसंती, राणी तर मुन्ना, मोती, चेतक हे अश्व येथील भूमीत धावणार आहे. सलग तिसऱ्या वर्षी २५ फेब्रुवारी रविवार रोजी येथे  घोड्यांवर बसून शर्यतीच्या स्पर्धा रंगणार आहे. आकर्षण असलेले घोडे स्पर्धेसाठी आदल्या दिवशीच दाखल होणार आहेत.

राज्यभर आठवडे बाजाराच्या दिवशी दर मंगळवारी घोडे बाजार भरणारे हे एकमेव शहर असून दर बाजार समितीच्या आवारात खरेदी -विक्रीचा अधिकृत बाजार भरत असतो. त्यामुळे येवला शहरात देशभरातून घोडे खरेदीसाठी शौकीन येतात.ऐतिहासिक परंपरा जपलेल्या या शहरातील घोडे शौकिनानी घोड्यावर बसुन स्पर्धा घेण्याची परंपरा सुरू केली असून या स्पर्धेचे आकर्षण आता मोठया प्रमाणावर वाढू लागले आहे.

रविवारी नांदगाव मार्गावरील वडगाव रेल्वे गेटजवळ भव्य मैदानावर सकाळी ९ वाजेपासून  ही अनोखी स्पर्धा दिवसभर रंगणार आहे.स्पर्धेसती कच्छ भुज, पालिताना, सुरत,  अहमदाबाद यासह मुंबई, नेरुळ, अलिबाग, पुणे, बारामती, सोलापूर, औरंगाबाद, नांदेड, चाळीसगाव, मालेगाव, नाशिक याठिकाणचे घोडे आणि घोडेस्वार सहभागी होणार आहेत.

स्पर्धेतील प्रथम विजेत्यास ५१ हजारांचे तर द्वितीय विजेत्यास ३१ हजार,तृतीय २१ हजार,चतुर्थ क्रमांकास  ११ हजारांचे बक्षीस देण्यात येणार आहे. स्पर्धेत सहभागी होणाऱ्या प्रत्येक स्पर्धक घोड्यास सन्मानचिन्ह देऊन गौरविण्यात येणार आहे. स्पर्धेचे विशेष आकर्षण नेरुळ येथील सरपंच गोल्डमन भगवान चंचे,येवल्याचे गोल्डमन पंकज पारख यांची उपस्थिती असनार आहे. स्पर्धेत सहभागी होण्यासाठी नगरसेवक झामभाऊ जावळे (९४२२७५६२८८), पप्पू गांगुर्डे(९८५०२३१६५०), पिंटू परदेशी(७७०९५११६६९), सरपंच पोपट वाघ (९०११६२८८५१) यांच्याशी संपर्क साधण्याचे आवाहन केले आहे.