पंचवटी ः गेल्या काही दिवसांपासून वाढलेल्या आवकेनंतरही आज बुधवारच्या आठवडे बाजारात फळभाज्यांसह पालेभाज्यांचे दर तेजीतच राहिले.

कोथिंबींरीच्या अवघ्या चार सहा काड्यांसाठी पंधरा ते वीस रूपये तर चांगल्या दर्जाच्या मेथीच्या जुडीसाठी चाळीस ते पन्नास रूपये मोजावे लागल्याने काही प्रमाणात गृहिणींचे अर्थकारणही बिघडल्याचे चित्र होते. 

गोदावरीच्या दुतर्फा दर बुधवारी आठवडे बाजार भरतो. याठिकाणी धान्यासह पालेभाज्या व तत्सम गृहोपयोगी वस्तू उपलब्ध होत असल्याने मोठी गर्दी उसळते. मात्र गेल्या काही दिवसांपासून मोठ्या प्रमाणावर आवक होऊनही फळभाज्यांसह पालेभाज्यांचे दर तेजीतच राहिले. 
बाजारात कमी संख्येने आवक झालेल्या मेथीची जुडी 40 ते 50 पन्नास रूपयांत उपलब्ध होती तर अल्प प्रमाणात आलेल्या कोथिंबीरीनेही भाव खाल्याचे दिसून येते. कोथिंबीरीच्या मोठ्या जुडीसाठी पन्नास ते साठ रूपये दर पाच सहा काड्यांच्या छोट्या जुडीसाठी पंधरा ते वीस रूपये मोजावे लागत होते. गेल्या काही दिवसांपासून खालवलेली पाणी पातळी व तीव्र उन्हामुळे बाजार समितीतही कोथिंबीरीची आवक मर्यादित राहिल्याने आठवडे बाजारातही भाव तेजीतच राहिले.