जुने नाशिक : मुख्यमंत्री उद्धव ठाकरे यांच्या समर्थनार्थ आणि बंडखोर आमदारांविरुद्ध शिवसेनेतर्फे रविवारी (ता.२६) मोर्चा काढण्यात आला होता. आमदार एकनाथ शिंदे, सुहास कांदे, दादा भुसे यांची प्रतीकात्मक तिरडी काढून दहन करण्यात आले होते. मोर्चा काढण्यासाठी अटी शर्थीच्या अधीन राहून परवानगी देण्यात आली होती. परंतु तिरडी काढणे, तिरडीसह पुतळ्याचे दहन करणे, यास परवानगी नाकारण्यात आली होती. अटी शर्थीचे उल्लंघन करत तिघांची तिरडी काढून अमरधाम येथे तिरडी आणि पुतळ्याचे दहन करण्यात आले. आयोजकांनी पोलिस आयुक्तांचे आदेशाचे उल्लंघन केल्याने पोलिस नाईक प्रफुल्ल जाधव यांच्या तक्रारीवरून बाळासाहेब कोकणे, वीरेंद्रसिंग टिळे, देवा जाधव, सुभाष गायधनी यांच्यासह अन्य सहा जणांवर भद्रकाली पोलिस ठाण्यात रात्री उशिरा गुन्हा दाखल करण्यात आला.