येवला (जि. नाशिक) : चाळीस वर्षे वयाच्या नराधम बापाने स्वतःच्या १३ वर्ष वयाच्या मुलीवर अत्याचार (Rape) केल्याची माणुसकीला काळीमा फासणारी घटना चिचोंडी खुर्द येथे घडली आहे. हा अत्याचार सहन न झाल्याने याच मुलीने आवाज उठवत पोलिस हेल्पलाइन क्रमांकावर (Police Helpline Number) तक्रार देऊन या घटनेला वाचा फोडली आहे. नराधम बापाला शहर पोलिसांनी बुधवारी रात्री अटक केली आहे. अत्याचाराच्या घटनेबद्दल समाजाच्या सर्व स्तरातून तीव्र निषेध करण्यात येत आहे.

फिर्यादी मुलगी तेरा वर्ष आणि पाच महिन्यांची असून तिचा नराधम बाप हा चाळीस वर्षांचा आहे. मुलीने शहर पोलीस ठाण्यात दिलेल्या फिर्यादीत म्हटले आहे. चिचोंडी खुर्द येथील चारी क्रमांक ३६ जवळ रहिवासी असलेल्या मजूर बापाने आपल्या मुलीवर राहत्या घरात ती पाचवीत असल्यापासून (वेळ आणि महिना माहीत नाही) ते आतापर्यत वेळोवेळी घरात कुणीही नसतांना एकटी असल्याचा फायदा घेत जीवे ठार मारण्याची धमकी देत अत्याचार केला. मालेगाव शहर पोलिस ठाण्याच्या सहाय्यक पोलिस निरीक्षक प्रीती सांवजी यांच्या उपस्थितीत गुन्हा दाखल करण्यात आला असून उपनिरीक्षक सूरज मेढे याप्रकरणी तपास करत आहे. जिल्हा पोलिस प्रमुख सचिन पाटील यांनीही या प्रकरणी लक्ष घातले असून येथील पोलिस निरीक्षक भगवान मथुरे यांच्या मार्गदर्शनाखाली पोलिसांनी पोक्सो कायद्याअंतर्गत (Pocso Law) गुन्हा दाखल केला आहे. या घटनेने तालुक्यात खळबळ उडाली असून सर्व स्तरातून निषेध व्यक्त केला जात आहे.