Nashik Crime News : अल्पवयीन मुलांचे अश्‍लील फोटो, व्हिडिओ सोशल मीडियावर व्हायरल करणे गुन्हा असतानाही ते करणाऱ्या ३१ जणांविरुद्ध नाशिक सायबर पोलिसांत गुन्हे दाखल करण्यात आले आहेत. गेल्या दोन वर्षांत नाशिकमध्ये ८९ जणांविरोधात चाइल्ड पॉर्नोग्राफी प्रकरणी गुन्हे दाखल करण्यात आले. सोशल मीडियावर अलीकडे अल्पवयीन बालकांचे अश्‍लील फोटो व व्हिडिओ व्हायरल केल्याचे प्रकार घडत आहेत. (Nashik Crime case has been registered against 31 people in case of child pornography marathi News)

नॅशनल क्राइम रेकॉर्ड ब्यूरोमार्फत (एनसीआरबी) ३१ संशयितांविरुद्धचे पुरावे महाराष्ट्र पोलिसांना प्राप्त झाले आहेत. सायबर पोलिस मुख्यालयातून त्यासंदर्भातील अहवालाचा ‘पेन ड्राइव्ह’ नाशिक पोलिसांना पाठविण्यात आला असून, शहर पोलिसांनी संबंधितांविरोधात गुन्हे दाखल केले आहेत. संशयितांनी इंटरनेटद्वारे बालकांचे अश्लील फोटो, व्हिडिओ अपलोड करून इतरांना शेअर केले आहेत.

व्हॉट्सअॅप, फेसबुक, स्नॅपचॅटसह इन्स्टाग्रामवरून हा प्रकार केल्याचे समोर आल्याचे समजते. त्यासंदर्भात यूजर्सची माहिती, आयपी ॲड्रेस, शेअर केलेला कन्टेट यासंदर्भातील सर्व पुरावे ‘एनसीआरबी’ने पोलिसांना दिले आहेत. त्यानुसार सायबर पोलिसांनी माहिती तंत्रज्ञान अधिनियम २००० चे कलम ६७ (ब) अन्वये गुन्हा नोंदवून पुढील तपास सुरू केला आहे.