Nashik News : रोहिले (ता. त्र्यंबकेश्वर) येथे पिण्याच्या आणि शेतीच्या पाण्याचा प्रश्न गंभीर असून, सरपंचांनी मंजूर झालेल्या पाटबंधारे खात्याच्या पाणीपुरवठा योजनेचे काम सुरू करावे, यासाठी आता थेट राज्यपालांना पत्र पाठवत कैफियत मांडली आहे. गेल्या ४२ वर्षांपासून येथील गावकरी रोहिले धरण झाले पाहिजे, यासाठी लढा देत आहे.

हा लढा यशस्वी झाला, योजना मंजूर झाली; मात्र त्याची मुहूर्तमेढ अजूनही रोवली जात नाही. स्व. गोपाळराव नामदेव तिदमे यांनी ४२ वर्षांपासून या धरणासाठी लढा दिला आहे. गेल्या दोन वर्षांपासून अथक प्रयत्न करून त्र्यंबकमधील रोहिले धरण योजना मुख्यमंत्री एकनाथ शिंदे यांनी मंजूर केली.

मात्र अजूनही त्याचे काम सुरू झालेले नाही. आचारसंहितेमुळे रोहिले गावकऱ्यांच्या अडचणीत भर पडली आहे. (latest marathi news)

त्यामुळे सरपंच रतन खोडे आणि उपसरपंच सचिन तिदमे यांनी थेट राज्यपालांना पत्र लिहीत या योजनेचे काम सुरू करण्याचे आदेश द्यावेत, अशी मागणी केली आहे.

"योजना मंजूर होऊन दोन वर्षे होऊनही अद्याप काम सुरू होत नाही. प्रशासनातील बाबू मंडळीच्या जंजाळात योजना रखडली आहे. माझ्यासह ग्रामस्थांवर काम सुरू होण्यासाठी बेमुदत उपोषण करण्याची वेळ आली आहे. असेच जर होणार असेल तर मतदानावरही बहिष्कार टाकावा लागेल."- सावळीराम तिदमे, रोहिले