Nashik Winter Update: अवकाळी पावसाने झोडपल्‍यानंतरही सध्या वातावरण ढगाळ राहते आहे. दिवसभरात काही वेळेसाठी पडणारे सूर्यकिरण नाशिककरांसाठी दिलासादायक ठरत आहेत. ढगाळ वातावरण राहात असले तरी गारठादेखील वाढतो आहे.

हवामान खात्‍याच्‍या अंदाजानुसार शनिवारी (ता.२) तुरळक प्रमाणात पावसाची शक्‍यता आहे. यानंतर मात्र पारा घसरण्याचा अंदाज आहे. (Nashik Winter Update Chance of rain today news)

ढगाळ वातावरणामुळे नाशिकचा पारा सातत्‍याने वाढत होता. त्‍यामुळे यंदाच्‍या हिवाळ्यात अपेक्षित गारठा जाणवलेला नव्‍हता. परंतु काही दिवसांपूर्वी झालेल्‍या अवकाळी पावसानंतर वातावरणात काही प्रमाणात गारठा जाणवू लागला आहे. शुक्रवारी (ता. १) नाशिकचे किमान तापमान १७.९ अंश सेल्सिअस राहिले.

तर कमाल तापमान २९.१ अंश सेल्सिअस नोंदविले गेले. येत्‍या काळात किमान तापमान १४ अंश सेल्सिअसपर्यंत खालावण्याचा अंदाज असल्‍याने वातावरणात गारठ्यातही वाढ होऊ शकते. तत्‍पूर्वी शनिवारी (ता.२) ढगाळ वातावरण राहून नाशिकमध्ये काही ठिकाणी तुरळक प्रमाणात पाऊस पडण्याची शक्‍यता आहे.

सायंकाळच्‍या वेळी वातावरणात गारवा जाणवत असल्‍याने, बचावासाठी नाशिककरांकडून स्‍वेटर, जॅकेटचा आधार घेतला जातो आहे. तसेच स्‍थानिक बाजारपेठांवरही परिणाम जाणवू लागला असून, नऊच्‍या सुमारास बाजारपेठांमध्ये शुकशुकाट बघायला मिळतो आहे.

नोव्‍हेंबरमध्ये ३२.९ मिलिमीटर पाऊस

अवकाळीने शहरासह ग्रामीण भागात अतोनात नुकसान केले होते. नोव्‍हेंबर महिन्‍यात एकूण ३२.९ मिलिमीटर पावसाची नोंद घेण्यात आली आहे. यापैकी २७ नोव्‍हेंबर या एका दिवसात तब्‍बल २९.१ मिलिमीटर पाऊस झाला होता.