निजामपूर-जैताणे (धुळे) : भामेर (ता.साक्री) शिवारातील म्हसाई माता मंदिराच्या प्रांगणात येथील नाभिक समाजबांधवांतर्फे संत सेना महाराज पुण्यतिथीनिमित्त नुकताच नाभिक समाजातील गुणवंत विद्यार्थ्यांचा पालकांसह गुणगौरव करण्यात आला. सामाजिक कार्यकर्ते सुभाष सोनवणे कार्यक्रमाच्या अध्यक्षस्थानी होते. तर म्हसाई ट्रस्टचे अध्यक्ष लक्ष्मीकांत शाह प्रमुख अतिथी होते.

सुरुवातीला लक्ष्मीकांत शाह, सुभाष सोनवणे आदींच्या हस्ते दीपप्रज्वलन व संत सेना महाराजांच्या प्रतिमेचे पूजन झाले. यावेळी सामाजिक कार्यकर्ते विजय महाले, मोहन सूर्यवंशी, वसंत सूर्यवंशी, सुनील सूर्यवंशी, निजामपूर-जैताणे समाजाध्यक्ष शरद पवार, उपाध्यक्ष जनार्दन चित्ते, दुकानदार संघटनेचे साक्री तालुकाध्यक्ष मोहन सूर्यवंशी, सचिव अशोक महाले, निजामपूर-जैताणे शहराध्यक्ष शरद सूर्यवंशी, उपाध्यक्ष छोटू पवार आदींसह समाजबांधव उपस्थित होते. याप्रसंगी नाभिक समाजातील दहावी-बारावी व उच्च शिक्षणात नैपुण्य मिळवणाऱ्या गुणवंत विद्यार्थ्यांचा पालकांसह मान्यवरांच्या हस्ते रोख बक्षिसे देऊन गुणगौरव झाला. 

गुणवंत विद्यार्थ्यांसह शिक्षक अनिल भदाणे, लक्ष्मीकांत शाह यांनी मनोगत व्यक्त केले. सुभाष सोनवणे यांनी अध्यक्षीय मनोगत व्यक्त केले. शिक्षक रवींद्र हिरे यांनी सूत्रसंचालन केले. दुकानदार संघटनेचे साक्री तालुकाध्यक्ष मोहन सूर्यवंशी यांनी आभार मानले. स्नेहभोजनाने कार्यक्रमाची सांगता झाली. कार्यक्रमाच्या यशस्वीतेसाठी नाभिक समाजबांधवांसह जिवा-सेना संघटना, दुकानदार संघटना, महिला मंडळ आदींनी विशेष सहकार्य केले.