नाशिक : आधुनिक युगात काहीही माहिती हवी असेल, तर हमखास "गुगल'वर शोध घेतला जातो. पण "गुगल'ने चक्‍क दुकानातून माल लंपास करणाऱ्या चोरट्याचा शोध लावला आहे. पण हा "गुगल' इंटरनेटचे सर्च इंजिन नसून नाशिक पोलिसांच्या श्‍वानपथकातील "गुगल' नावाचा श्‍वान आहे.
शनिवारी (ता. 17) उपनगर पोलिस ठाण्यात फिर्याद दाखल झाल्यावर पाहणीदरम्यान आढळलेल्या बुटामुळे गुन्हा उघडकीस आला आहे. शिखरेवाडी येथील समर्थ अपार्टमेंट येथील बंद गुदामात चोरट्यांनी गरम मसाला, धना पावडर असा सुमारे सहा हजारांचा माल चोरल्याची फिर्याद दिलीप पीतांबरभाई पटेल यांनी दिली. शनिवारी फिर्याद प्राप्त होताच उपनगर पोलिस ठाण्याचे वरिष्ठ पोलिस निरीक्षक भारतकुमार सूर्यवंशी यांच्या मार्गदर्शनाखाली गुन्हे प्रकटीकरण पथकाने सहाय्यक पोलिस निरीक्षक संतोष खडके यांनी घटनास्थळाची पाहणी केली. त्या वेळी तेथे काळ्या रंगाचे बूट आढळल्याने, तातडीने श्‍वानपथकाला पाचारण करण्यात आले. नाशिक पोलिस श्‍वानपथकातील डॉग हॅंडलर गणेश कोंडे यांनी "गुगल' या श्‍वानाला घटनास्थळावर असलेल्या बुटांचा वास दिला असता "गुगल' चोरट्याच्या मागावर निघाला. "गुगले'ने माग काढून घटनास्थळापासूनजवळ पण किचकट अशा महात्मा फुलेनगर येथील एका झोपडपट्टीत लपून बसलेल्या रेकॉर्डवरील गुन्हेगार इंद्रजित ऊर्फ इंद्या राजू वाघ (वय 19) याचा शोध घेतला. संशयित इंद्रजित सोफ्याखाली लपलेला असताना, त्याला शोधून काढले. यानंतर झोपडीची झडती घेतली असता, गुन्ह्यातील चोरीस गेलेला सुमारे सहा हजारांचा माल मिळून आल्याचे पोलिसांनी म्हटले आहे. "गुगल'मुळे काही तासांतच या गुन्ह्याची उकल होण्यास मदत झाली. 
उपनगर पोलिस ठाण्याचे वरिष्ठ पोलिस निरीक्षक भारतकुमार सूर्यवंशी यांच्या मार्गदर्शनाखाली प्रकटीकरण पथकाचे संतोष खडके यांच्यासह गोडसे, देशमुख, वानखेडे, श्‍वानपथकाचा श्‍वान गुगल आणि डॉग हॅंडलर गणेश कोंडे, बी. बी. मोरे, अरुण चव्हाण, देसाई यांनी संयुक्‍तिक कामगिरी करून काही तासांत गुन्हा उघडकीस आणला.