पिंपळनेर (जि. धुळे) : येथील वडारवाडीमधील १६ वर्षीय राजश्री मंजूळकर या अल्पवयीन मुलीचा संशयास्पद मृत्यू झाल्याची शंका व्यक्त करण्यात येत असून, तिचा मृतदेह विच्छेदनासाठी धुळे येथे पाठविण्यात आला आहे. पिंपळनेर पोलिस कसून तपास करीत आहेत. (Suspicious death of minor girl Dhule News)

हेही वाचा : नेट बँकिंग खात्यात ठेवा कमी रक्कम...जाणून घ्या कारण

पिंपळनेर पोलिसांत मुलीच्या मामांनी फिर्यादी दिली आहे. फिर्यादीत म्हटले आहे, की शहरातील वडारवाडीमधील रहिवासी राजश्री रामदास मंजूळकर (वय १६) हिला १२ मार्चला सकाळी साडेआठच्या सुमारास मंजुळाबाई कासूरकर हिने आवाज दिला परंतु तिने कोणताही प्रतिसाद दिला नाही व हालचालदेखील केली नाही.

ती बेशुद्धावस्थेत पडलेली आहे असे कळविले असता फिर्यादी पिराजी शिवराम कासूरकर (वय ४०) यांनी खासगी वाहनाने पिंपळनेर ग्रामीण रुग्णालयात दाखल केले. डॉ. भामरे यांनी तिला मृत घोषित केले.

राजश्रीचा संशयास्पद मृत्यू झाल्याची शंका व्यक्त करण्यात येत असून, तिचा मृतदेह विच्छेदनासाठी धुळे येथे पाठविण्यात आला. माहिती मिळताच उपविभागीय पोलिस अधिकारी प्रदीप मैराळे घटनास्थळी दाखल झाले. पोविस उपनिरीक्षक पी. पी. सोनवणे तपास करीत आहेत.