अमरावती : गेल्या काही वर्षांपासून रखडलेल्या मिसाईल प्रकल्पाला अखेर चालना मिळाली आहे. पालकमंत्री प्रवीण पोटे पाटील यांच्या पाठपुराव्यामुळे येत्या एका महिन्यातच या प्रकल्पाची खऱ्या अर्थाने मुहूर्तमेढ रोवली जाणार आहे.
रशियाच्या एका कंपनीसोबत या संदर्भात करार झाला आहे. मुख्यमंत्री देवेंद्र फडणवीस तसेच केंद्रीय मंत्री नितीन गडकरी यांच्या उपस्थितीत येत्या एका महिन्यातच या प्रकल्पाची पायाभरणी होणार आहे.
कमी अंतराच्या मिसाईलची (शॉट मिसाईल) निर्मिती या ठिकाणी होणार आहे. नांदगावपेठच्या पंचतारांकित औद्योगिक वसाहतीत भारत डायनॉमिक्‍सतर्फे मिसाईल कारखाना सुरू होणार होता. मात्र, गेल्या सात ते आठ वर्षांपासून हा प्रकल्प रखडला होता. या कारखान्यासाठी नांदगावपेठ औद्योगिक वसाहतीत जागासुद्धा निश्‍चित झाली आहे. त्या ठिकाणी कुंपण तसेच अन्य कामेसुद्धा करण्यात आली. परंतु, प्रत्यक्षात कारखाना सुरू होत नव्हता. त्यात येणाऱ्या अडचणी दूर करण्याच्या संदर्भात पालकमंत्री पोटे यांनी सरकारकडे पाठपुरावा केला.